Azken agur jendetsua Rufino Murgiari
Lazkaoko herriak, Goierriko kirolak eta euskal txirrindularitzak agur sentitua egin zioten, atzo, Rufino Murgia masajista eta Euskaltel Euskadiko laguntzaileari. Lazkaon egin zen hileta elizkizunean jendetza elkartu zen. San Migel eliza, alboko plaza eta inguruak bete zituzten Murgiaren lankide, lagun eta herritarrek. Txirrindulari asko joan zen agurrera, nola Euskaltel Euskadiko taldeko ziklistak, ziklista ohiak eta arduradunak, hala tropel profesioanelko zein amateurrekoak.
Hil kutxari ohorezko arkua egin zieten Beasaingo eta Ordiziako txirrindulari eskoletako mutikoek, gurpilekin. Bukaeran, aurreskua dantzatu zioten dantzariek. Murgiaren hiru seme-alabek hitza hartu zuten elizkizunean, aita gogoratzeko eta jasotako mezuak eskertzeko.
Murgiaren familiak honako eskertza gutuna argitaratu du hainbat webgunetan:
HIletaren garaian, eliza inguruan jendez beteta, atzo./Aimar Maiz
Rufino, batzuentzat Rufo, Rufi… guretzat AITA. Beti egon zara gure gainean, behar izan dugun guztietan laguntzen eta gure bidetik oker ez gaitezen saiatzen. Edonor laguntzeko prest familia sekula ahaztu gabe, era batera edo bestera beste askok ere beraien aita edo mentoretzat zaituzte. Beti irrifartsu eta besteoi irrifarrak ateraz, ez ditugu sekula ahaztuko zure txantxak. Hainbeste gauza erakutsi dizkiguzu, eta hainbeste momentu on pasarazi, ezin dizugula sekula eskertu gugatik egin duzun guztia. Garena bagara zuri esker da eta zu gutaz harro joan zaren bezala, gu ere harro gaude lortu duzun guztiaz. Beti erakutsi izan diguzu amore eman gabe borrokatzen eta aurrera egiten eta orain badakigu zure indar guztiak ditugula bizitzan ditugun helburu guztiak betetzera iristeko. Badakigu ezer gutxik egiten zintuela gure ametsak betetzen ikusteak baino zoriontsuago, horregatik jarraituko dugu atsedenik hartu gabe, momentu oro zugan pentsatuz. Neguan ziklokroseko lokatzetan edo Somporteko elurretan, udan munduko edozein lasterketetan, beti egongo da berriro beteko ez den hutsune bat. Eskerrik asko bihotz-bihotzez eman diguzun guztiagatik eta ez ahaztu beti izango zaitugula gurekin. Azken egunetan milaka mezu jaso ditugu zuen animoak eta indarrak bidaltzen, beste behin eskertzea besterik ez zaigu geratzen. Eskerrik asko momentu zail hauetan gurekin egoteagatik.
