Artaldeak Ordiziako kaleak zeharkatzen, iaz.
Asteazkeneroko azokarekin batera, hitzordu garrantzitsua izango da bihar Ordizian. Artzain Eguna ospatuko da, artzaintzari eta gaztari gorazarre egiteko eguna. 2014ko Ordiziako azoka berezien egutegiari hasiera emango zaio biharkoarekin.
Aurtengoan Donostiako Mirador de Ulia jatetxeko jabe eta sukaldari Ruben Trincado arduratuko da gaztaren denboraldi berriari hasiera emateaz gazta moztuz. Aldez aurretik, udaletxeko areto nagusian egingo den ekitaldian, Ardiekin hazi-jartze eta latxa arrazaren errekuperazio zentroari omenaldia egingo zaio, bere 25. urteurrenean latxa eta karrantzana arrazak hobetzeko egindako lanagatik. Gaztaren erregulartasun-kalitate sariak ere banatuko dituzte; aurten Olaberriako Santi Etxezarreta artzainari eta Sunbillako (Nafarroa) Luis Vicente Larrarteren gaztandegiari ere emango diote.
Garai batean artaldeak negua amaieran mendira joateko egiten zuten bidea gogoratuz, Ordiziatik erdigunetik artaldeak igaroko dira goizeko hamaiketan, 2.000 ardi baino gehiago. Edonola ere, goizeko bederatzietatik aurrera izango da zer ikusirik Ordizian. Garagartza plazan latxa arrazako 50 bat artzainen aharien erakusketa-lehiaketa egingo da, baita salmenta ere. Bertan, 200 abelburu inguru izango dira ikusgai. Gazta ere egingo da zuzenean bertan; baita ile-mozketa zein mami dastaketa ere.
Ohitura den gisan, Garagartza plazan baita ere, 40 Euskolabel arkume burruntziak prestatuko ditu Karlos Ibarrondok. 11:30etatik aurrera jarriko dituzte salgai pintxoak; bildutako dirua Aspanogi Gipuzkoako Haur Minbizidunen Gurasoen Elkartearentzat izango da.
Goizean zehar trikitilari eta dultzaina joleak arduratuko dira herriko kaleak alaitzeaz.
EGITARAUA
- 9:00. Ahari eta ardien erakusketa-lehiaketa Garagartza plazan.
- 11:00. Artaldeak igaroko dira erdigunean barrena.
- 11:15. Idiazabal gaztaren denboraldi berriaren aurkezpen ofiziala udaletxeko batzar aretoan.
- 11:30. Gazta egitea eta mami dastaketa Garagartza plazan.
- 11:30. Burruntzian erretako esne bildotsen dastatzea Garagartza plazan.
- 12:15. Ile-mozte erakustaldia Garagartza plazan.
- 13:00. Lehiaketen garaikur-banaketa Garagartza plazan.
