Herriarteko txapelketan Goierriko talde ia guztiak igaro dira, Lazkao tanto batengatik ez
Zailena egin dute palari lazkaotarrek, kanporaketa bina orekatu. Pala motzean 27 tanto egin dizkio Debak, komeni baino bat gehiago. Ataun, eskuan, eroso pasatu da (4-2), eta Lazkao du zain
Jardunaldi peto-petoa egiteko zorian izan dira, asteburuan, Gipuzkoako Herriarteko pilota txapelketan parte hartzen ari diren Goierriko talde guztiak. Palako Lazkao izan ezik, gainontzeko hiru taldeek lortu dute hurrengo kanporaketara igarotzea: eskuz Ataunek, eta palan Olaberriak eta Ordiziak.
Ospela, Lazkaorena izan da. Kanpoan nola geratu den ikusita gehiago, gainera. Debak tanto bakar batengatik utzi du bazterrera. Olaberrian jokatu zuten, ostiralean. Joaneko aurkako emaitza (2-0 Debaren alde) berdintzea lortu zuten: larruz Andonegi-Oiarbidek 35-34 irabazi zuten (han galdu, zenbaki berdinekin), eta motzean Ibarguren anaiek 40-27 irabazi zuten (Deban 40-26 galdu).
Olaberriko palari taldea.
