Asteburuan Euskal Herriko mus txapelketako bost kanporaketa jokatuko dira Goierrin

Otsailean zehar antolatu beharko dira herrietako kanporaketak, Gipuzkoako finalera sailkatzeko. Goierrin dagoeneko lau jokatuta daude, asteburu honetan bost izango dira, eta hurrengo bi asteetan beste bost.

Aimar Maiz

Goierri

2023/02/08

Euskal Herriko 14. Mus Txapelketaren atariko fasea ari da bizkortzen. Otsailean zehar jokatu beharko dira herrietako kanporaketak, hilaren 26ra arte. Goierriko herri askotan antolatu dituzte saioak. Lautan dagoeneko jokatu dituzte; beste hamar tokitan hurrengo hiru asteburuetan izango dira.

Asteburu honetarako bost mus kanporaketa daude iragarrita. Lehenbizikoa, bihar gauean Legazpiko Karibe Zaharrean. Ostiralean hiru gehiago jokatuko dira, eta igandean beste bat.

Bikoteko 20 euro ordaindu behar da sarrera, kasu guztietan. Gipuzkoako finalera sailkatuko dira herri bakoitzeko onenak; partaide kopuruaren arabera bikote bat, bi, hiru edo gehiago joango dira herrialdeko txapelketara, Debara, martxoaren 11n. Ondoren, Euskal Herriko final handia Zornotzan (Bizkaia) izango da, martxoaren 25ean.

Lau herritan jada jokatuta

Oraingoz, zazpi bikote goierritarrek daukate txartela. Idiazabaldik –urtarrilaren 21ean jokatu zen– Jon Esnaola eta Mikel Saralegi joango dira; Ezkiotik (urtarrilaren 27an), Txomin Bidegain eta Ximon Idiakez.
Zaldibian egin dute orain arteko mus saio jendetsuena, lehengo ostiralean, 21 bikoterekin. Beni Gailurralde-Arantxa Luluaga, Urtzi Garmendia-Joxema Arantzabe, eta Agurtzane Azurmendi-Iban Hernando sailkatu dira, lehen hirurak.
Mutiloan, otsailaren 3an, 11 bikote jardun ziren. Joseba Zabaleta-Asier Agirre irabazleak eta Iñaki Ugalde-Maialen Etxeberria sartu dira Gipuzkoarako.

Mus saioak herrietan