Lazkaoko gazteek inauterietako mozorro festa ospatuko dute

Egun osoko festa egingo dute, eguerdian elkartu, bazkaria Amebin egin, eta arratsaldean jarraitu. Mozorrotzeko gaia 'euskal kultura' jarri dute.

Aimar Maiz

Lazkao

2024/02/02

Lazkaoko Gazte Asanbladak herriko inauteri festa antolatu du. Bihar, larunbata, egun osoko egitaraua prestatu dute, eta Lazkaoko plaza eta inguruak mozorro koloretsuz alaituko dituzte.

Mozorrotzeko gaitzat euskal kultura jarri dute. Hor barruan sartzen diren edozein gai, pertsonaia edo pasarte irudikatuko dituzte gazteek. Eguerdian, 12:00etan hasiko da festa. Plazan elkartu, eta karropoteoa egingo dute herrian barrena, musika jarrita kalejira modura. Ohitura duten bezala, taldeko argazkia aterako dute, 14:00etan, Herriko aurrean.

Bazkaria Amebin

Lagun arteko bazkariarekin jarraituko dute mozorrotutako gazteek. Amebi jatetxean egingo dute otordua, 14:30ean. Autobusean egingo dute joan-etorria, Itzala paretik.

Azkenik, 18:30ean, atzera kalean, Elektropikala elektrotxarangak girotuko du inauteria.