Hiru lan eremu lehenetsi dituzte uholdeen ondorioei aurre egiteko
Uholdeen Mahaia deitu du gaur Gipuzkoako Foru Aldundiak, eta herri kaltetuetako alkate eta teknikariek parte hartu dute, besteak beste. Errepideak eta bidegorriak txukuntzea, kaltetutako hogei enpresen kalteak ebaluatzea eta baserrietako sarbideetan izandako kalteak kuantifikatzea dira lehenetsitako helburuak.
Gaur goizean Gipuzkoako Foru Aldundiaren Uholde Mahaiaren bilera.GFA Irune Berasaluze Gipuzkoako Foru Aldundiko bozeramaileak gaur goizean Gipuzkoako Foru Aldundiak Tolosa eta Goierriko udalerrietako alkateekin izandako bilerari buruz hitz egin du. Ostiral gaueko euriteek kalte handiak eragin baitituzte udalerri hauetan batez ere bide publikoan, errepideetan, landa eremuetan, etxebizitzetan, baserrietan, garajeetan, enpresetan eta dendetan. Hiru lan eremu lehenetsi dituzte uholdeen eraginei aurre egiteko: errepideak eta bidegorriak txukuntzea, kaltetutako hogei enpresen kalteak ebaluatzea eta baserrietako sarbideetan izandako kalteak kuantifikatzea.
Eider Mendoza diputatu nagusiak, Jose Ignacio Asensio lehen diputatu nagusi ordea eta jasangarritasuneko diputatuak, Irune Berasaluze foru bozeramaile eta Gobernantzako diputatuak, Unai Andueza Ekonomia Sustapeneko eta Proiektu Estrategikoetako diputatuak, Xabier Arruti Lurralde Oreka Berdeko diputatuak eta Felix Urkola Bide Azpiegituretako eta Lurralde Orekako diputatuak parte hartu dute aldundiko kide modura. Udal ordezkari gisa, berriz, Abaltzisketa, Alegia, Altzo, Anoeta, Ataun, Baliarrain, Berastegi, Berrobi, Elduain, Gaintza, Hernialde, Ibarra, Ikaztegieta, Larraul, Lazkao, Lizartza, Orendain, Tolosako eta Zaldibiako alkateek eta teknikariek parte hartu dute. Alde guztiek batera ebaluatu dute kalte materialen norainokoa, horiek konpontzeko neurriak abian jartzeko eta herritarrei laguntzeko, “normaltasuna berreskuratu ahal izan dezaten”, adierazi du Berasaluzek.
Tolosaldeko eta Goierriko 24 udalerri
“Gaurko bileran euri jasen ondorioen larritasuna egiaztatu dugu 24 udalerritan”, adierazi du Berasaluzek. Guztira, hogei bat enpresetan ere kalteak izan dira, batez ere Alegiako, Amezketako eta Ikaztegietako industrialdeetan. “Gainera, 53 gorabehera izan dira errepideetan euriteen ondorioz, eta ostiraletik igandera bitartean suhiltzaileen 190 abisu inguru artatu dira, batez ere uholdeekin, galtzadako urarekin eta lur-jausiekin lotuta”.
Foru bozeramaileak gaineratu duenez, Foru Aldundiak ekainaren 13tik 14rako gauean “guztira 42 suhiltzaile eta agintari mobilizatu zituen Oria (Tolosa), Goierri (Ordizia), Korosti (Legazpi), Urola (Azpeitia), Kosta (Zarautz) eta Bidasoako (Irun) parkeetan, jasotako abisu guztiei erantzuteko”. Bestalde, eta garbiketa lanetan aurrera egiteko eta edozein larrialdi artatzeko, “40 suhiltzaile eta 10 ibilgailu baino gehiago mobilizatu dira larunbatean eta igandean, bereziki kaltetutako eremuetan (Tolosa) eta Goierrin (Ordizia) eta beste parke batzuetan, erabilgarritasunaren arabera”.
Egonkortze lanak errepideetan
Berasaluzeren hitzetan, “larunbateko lehentasuna izan zen giza galerarik egon ez zela egiaztatzea eta sarbideak erraztea, kaltetutako errepideak berriro irekiz, Gaintza eta Altzo Azpi salbuespenekin izan ezik, horiek igande eguerdian ireki ahal izan baitziren, bide guztiak irekita, A-15 errepidea barne, aurreikusitako ordutegia baino lehen berriro ireki ahal izan baitzen azken hau.
Puntu horretan, foru diputatuak adierazi du 50 jarduketa baino gehiago egin zirela 18 errepidetan, eremuko 25 udalerri baino gehiagotara irisgarritasuna modu seguruan bermatzeko. Lan hauetan, besteak beste, errepide arloko 71 profesionalek baino gehiagok parte hartu dute. “Kaltetutako bide-sarea % 100 berrezarri zen 72 ordu baino gutxiagoan, lur-jausi guztiak garbi zeudela”. Berasaluzek gaineratu duenez, “orain egonkortze-lanak eta eremu horietako bide-segurtasuna bermatzeko beharrezkoak diren beste jarduera batzuk egingo dira”.
Komunitateari eskerrak
Berasaluzek, azkenik, eskerrak eman dizkie pertsona guztiei: suhiltzaileei, errepideetako teknikariei, bide segurtasuneko agenteei, boluntarioei, udalerri horietako bizilagunei eta lan egitera hurbiltzeko eta esku bat emateko eragozpenik izan ez duten guztiei. “Gipuzkoak berriro ere erakutsi du lurralde solidarioa dela, eta une zailenetan lagun hurkoari laguntzeko laguntza emateko zalantzarik ez duten pertsonen komunitate sendoa duela”.
Ildo horretan, Berasaluzek, ere gaur egindako erakunde arteko bileran guztiek adierazi duten asmo ona eta elkarlanerako gogoa azpimarratu du, non “laguntzeko eta uholde horien ondorioak arintzeko beharrezkoak diren neurriak lehenbailehen aktibatzeko borondate argia erakutsi den”.
Lehenetsitako lan eremuak
Gaur goizean izandako topaketaren ondorioz, hiru lan eremu lehenetsi dira. Alde batetik, dagoeneko ireki diren errepideak eta bidegorriak garbitzeko lan egingo da, baina txukuntzea falta da, uholdeen hondarrak ezabatuz.
Bigarrenik, kaltetutako hogei enpresen kalteak ebaluatuko dira. Berasaluzek puntu horretan nabarmendu duenez, “Ezkio, Gabiria eta Ormaiztegiko uholdeetan egin zen bezala, eskualdeko garapen agentziekin batera lanean ari gara kaltetutako enpresei laguntzeko”, helburua da behar dituzten baliabide teknikoekin laguntzea, jarduerari normaltasunez ekiteko.
Azkenik, baserri bideei eta ur-kanalizazioei dagokienez, baserrietako sarbideetan izandako kalteak kuantifikatuko dira, Partzuergorako txosten teknikoak egiteko eta Etorlurrekin batera egin daitezkeen jarduerak baloratzeko.
