G007 autobus linearen Ordiziako geraleku berria, San Bartolomen
Urriaren 20tik aurrera erabilgarri izango da Zumarraga eta Donostia elkartzen dituen G007 autobus linearentzat geraleku berria. San Bartolomeko aparkalekuan, Eroskiren ondoan egokitu dute.
Azahara Dominguez Diputatua eta Adur Ezenarro Ordiziako Alkatea.GFA. Lurraldebusen GO07 autobus linearen ibilbidea hobetzeko helburuarekin, urriaren 20tik aurrera, Ordizian geraleku berria izango du, San Bartolomeko aparkalekuan, Eroskiren ondoan egokitutako geltoki berria.
Mugikortasuneko, Turismoko eta Lurralde Antolaketako diputatu Azahara Dominguezen esanetan, kokapen berriari esker, “erabiltzaileei denbora aurreztuko” dute. “Herritarren esperientzia hobetzeko beharrezkoak diren doikuntzak egiten jarraitzen dugu, garraio publiko jasangarria, erosoa, azkarra eta eskuragarria izateko aukera izan dezaten, Donostiara eta alderantziz joan ahal izateko. Eta, ildo horretan, gure ustez, geldialdi-aldaketa horrek aukera ematen digu eskualde horietako bizilagunen eskaera historikoari erantzuteko udaberrian martxan jarri den linea horri beste hobekuntza bat gehitzeko”, gaineratu du.
Izan ere, Diputatuak azaldu duenez, aldaketa honekin erraztu egiten da autobusak N-I errepidean sartzea, bi norabideetako ibilbide-denborak murriztuz. “Donostiarantz bidaiatzen duten erabiltzaileek hiru minutu inguru irabaziko dituzte, eta hiriburutik ateratzen direnek bost minutu inguru aurreztuko dituzte”, adierazi du Dominguezek, eta hainbat erabiltzailek eskatu zuten gaia zela azaldu du. Gainera, diputatuak Ordiziako Udalarekin izandako lankidetza eskertu du, erakunde honek egokitu baitu geltoki berria.
Albiste ona, ordiziarrentzat
Adur Ezenarro, Ordiziako alkatearentzat “albiste oso ona da ordiziar guztiontzat”. Izan ere, “autobusaren geraleku berriak denbora aurreztea eta erosotasuna ekarriko dizkigu autobusaren erabiltzaile garen guztiori. Gainera, autobusak erdigunetik aterako dira, sor zezaketen eragozpenak murriztuz. Apustu sendoa egiten dugu mugikortasunaren alde, eta hau urrats garrantzitsua da. Aldundia eta udalaren arteko elkarlanaren fruitua da, eta hori ere eskertzekoa da. Azken finean, herritarren ongizatea eta egunerokotasuna hobetzeko urratsak ematen jarraitzeko konpromisoa dugu, eta gure gain zeuden lanak eta eremua atontzeko egin beharrekoak denbora errekorrean egin ditugu”.
Alkateak azpimarratu duenez, “egia da oraindik ere Iberdrolako zutabe bat mugitu beharra dagoela, baina hori enpresari dagokio eta eskera eginda dago. Hala ere, horrek ez du galaraziko zerbitzu berriaren funtzionamendua, baizik eta aldaketa egiten denean onura handiagoa ekarriko du. Irisgarritasuna hobetzea giltzarria da, eta orain tren geltoki berriari eta bertan eraiki den igogailuari esker San Bartolomeko geraleku berria eta herrigunearekiko lotunea hobetu egingo dira”.
Arrakasta handia
Mugikortasuneko, Turismoko eta Lurralde Antolaketako Diputatuak gogorarazi duenez, GO07 lineak ez du oraindik lehen seihilekoa bete, eta “arrakasta handia” izan du. “Herritarren erantzuna hain izan da positiboa, non ohiko errefortzuak jarri behar izan ditugun ordu-tarte guztietan, eta lau errefortzu-autobus ere mobilizatu behar izan ditugu goizeko lehen orduan Donostiarako noranzkoan”. Hala ere, “linea berria den aldetik, herritarren esperientzia hobetzeko eta garraio publiko jasangarri, eroso, azkar eta eskuragarrirako aukera izateko beharrezko egokitzapenak egiten jarraitzen dugu, Donostiara eta alderantziz joan ahal izateko”, gaineratu du.
Ordiziako geraleku berria da beste hobekuntzetako bat: “Geldialdi aldaketa horri esker, beste hobekuntza bat egin ahal izango dugu eskualde horietako bizilagunen eskaera historikoari erantzunez udaberrian martxan jarri genuen linea honetan”. Era horretan, diputatuak baieztatu du udalekin eta, oro har, herritarrekin batera lanean jarraituko duela, “gure esku dauden hobekuntza guztiak ezartzeko, gero eta pertsona gehiagok beren joan-etorrietan garraio publikoaren aldeko hautua egin dezaten, eta, horrela, herritar guztiei aukera-berdintasuna eskaintzeko”.
