San Prudentzio jaiei hasiera eman diete Lazkaon txupinazoarekin
San Prudentzio jaiak hasi dira Lazkaon. Giro apartan abiatu dira festak eta datozen egunetan herria ekitaldiz, musikaz eta kolorez beteko da.
Lazkaok jada piztu du festaren sua. Gaur arratsaldeko 18:00etan, Gazte Asanbladako kideek bota dute San Prudentzio jaien hasiera ofiziala adierazi duen txupinazoa, udaletxeko balkoitik. JundaJo Txaranga eta Erraldoi eta Buruhandi Konpartsa lagun zituztela, lehen suziriaren hotsarekin batera lehertu da giroa plazan.
Txupinazoak ez du hutsik egin: plazan bildu den jendetza kolorez eta irribarrez bete da, eta lehen suziriaren hotsak festaren hasiera indartsu markatu du. Gazte Asanbladak pregoia irakurri du suziriaren aurretik, eta bertan adierazi dute aurten gazteen lana eta herriko kulturan duten ekarpena aintzat hartu nahi izan dutela.
Lazkaoko kaleetan lehen orduetatik nabaritu da jai giroa. Horrela, apirilaren 25etik maiatzaren 1era ospatuko diren San Prudentzio jaiek lehen pausoa eman dute: musikaz, dantzaz, haur jarduerez, kirolaz eta herri ekintzez betetako egitarau zabala dute aurretik lazkaotarrek.
Festa hasi da, eta lehen orduetatik ikusi da aurten ere ez dela hutsik egingo: San Prudentzio jaiek martxa ederrean ekin diote!
