Merkataritza

Erosketa bonu kanpaina berria martxan Ordizian

Azaroaren 3tik aurrera erosi ahal izango dira Ordizian elkartearen bulegoan. 20 ordaindu eta 30 euro gastatzeko 3.000 bonu jarriko dituzte salgai.

Loinaz Agirre

Ordizia

2025/10/30

Bonu kanpaina berria martxan jarriko du Ordiziako Udalak, Ordizian Merkatari Elkartearekin lankidetzan, «hirugarren sektorea sustatu eta hari balioa emateko». Bonu kanpainarekin, «gaur egun udalerrian dagoen merkataritza sektorea indartu eta bultzatu» nahi dute, kontsumitzaileei «abantaila ekonomiko bat» eskainiz. Hain zuzen ere, azaroaren 3tik 30era bitartean erabiltzeko, 3.000 bonu jarriko dira salgai 20 euro ordainduta 30 euro gastatzeko aukera emango dutenak; udalak gainerako 10 euroak ordainduko ditu. Horrela, «90.000 euroko diru sarrera eragingo da herriko negozioetan».

Altxorra

Adur Ezenarro Ordiziako alkateak aurkezpenean nabarmendu duenez, «abantaila hori, zalantzarik gabe, kontsumitzaileentzat erakargarria izango da eta Ordiziako merkataritza, ostalaritza eta zerbitzu establezimenduak bisitatu eta bertan erosketak egiteko gonbita egiten diegu. Ez gara nekatuko honakoa esateaz: Ordizian bizi eta Ordizian erosi. Altxorra dugu gure herriko merkataritza, eta bertan kontsumitzea da hartu beharreko hautua».

Astelehenetik aurrera jarriko dituzte bonuak salgai, izakinak agortu arte, Ordiziako Merkataritza Bulegoan (Santa Maria kalea, 21), 10:30etik 12:30era eta 17:30etik 19:30era bitartean.

16 urtetik gorako edonork eros ditzake bonuak, Ordiziakoak izan ala ez. Hala ere, pertsona bakoitzak, gehienez ere, bere izenean bi bonu eta beste baten izenean beste bi erosi ahal izango ditu, ordezkatuaren NANa aurkeztuz.

80 saltoki inguru

Udalak egindako aurreikuspenaren arabera, 80 saltoki inguruk egingo dute bat kanpainarekin. Era horretan, tokiko merkataritzaren bidez Gabonetako erosketak azaroan egiteko aukera izango dute herritarrek, « kalitatezko eskaintza zabala» eskaintzen duten Ordiziako saltokietan.

Establezimenduen errenda