KKinzonak urte zahar gaueko kanpaikadak eskainiko ditu UTBn
Urretxuko eta Zumarragako KKinzona proiektu komunikatiboak urte zahar gaueko kanpaikadak eskainiko ditu Urola Telebistan. Telebistarako programa berezi bat prestatu dute gazteek, abenduaren 31an 23:30etik aurrera emitituko dena. Urola Telebistan izango da hori, eta 00:15ak ingurura arte luzatuko da. Saio osoa gaztetxeko eta KKinzonako kideek grabatutako lanekin osatu dute, eta aurreratu dutenez, «umore puntu nabarmena izango du». Bideoak, sketxak, trailerrak, bideoklipak edota adierazpen instituzionala ere badituzte, 45 minutuko programa berezian. «Programa berezia, polita, zoroa, autoktonoa, orijinala eta herrikoia izango da, ohiko saioen desberdina», aurreratu dute.
