Lazkaon benetan hastera doa
Festen egitarauari gaur berrekingo diote Lazkaon. San Prudentzio eguna bihar ospatuko dute, umeen eguna ostiralean eta kuadrillena larunbatean. Igandera arte luzatuko dituzte jaiak.
Urte askoan indarrean dirauten ohituren bilduma bat izango da Lazkaoko jaien bigarren ekinaldia, gaurtik igandera bitartean. Lazkaoko txirrindularitza probak 73. ekitaldia du, eskualdeko igeriketa lehiaketak 24.a, bakailaoa prestatzeko sukaldari topaketak 28.a, sueltoko dantza txapelketak 36.a… Berriagoak dira beste batzuk; prozesioa egiten duela 20 bat urte hasi ziren berriz, udalkideen soka-dantzak 13. aldia izango du, helduen danborradak zazpigarrena.
Horiek eta gehiagok osatuko dute bost eguneko egitarau mardula. San Prudentzio eguna bihar ospatuko dute lazkaotarrek. Ostiralean umeen eguna da; haur jolas parkeak hiru lekutan jarriko dituzte, adinaren arabera mailakatuta. Larunbatean, berriz, kuadrillen juntadizoa dago, koloredun blusak soinean.
Berritasunen aldetik, gaueko kros mistoa berreskuratuko dute. Ostiral gauean jokatuko da, herri barruko ibilbidean. San Prudentzio ermitan, biharko mezaren ondoren, hamaiketakoa zerbitzatuko dute, bestetik. Haurrentzat gymkana berezia ere badago. 160 umek eman dute izena, eta sariak nahiz sorpresak jarriko dituzte haientzat.
Musika, askotarikoa
En Tol Sarmiento taldeak joko du larunbatean.
OHARRAK · Kantakaren kontzertua. Abesbatzak bihar 20:30ean kantaldia egingo du, San Prudentzion. Javier Alberdik zuzenduta, Debora Herrero sopranoa bakarlari eta Arantxa Gastesi piano jotzailea ere ariko dira. Euskal errepertorioak osatuko du saio gehiena. · Ikastolakoen eskulanak. Ikasleen eskulanak San Prudentzio eskolako beirate-aretoan jarriko dute. Gaur (17:00-19:00), bihar (11:00-13:00) eta etzi (goizez eta arratsaldez) ikusi ahalko dira. Ikastolan afariak, berriz, bihar, ostiralean eta larunbatean dira. · Azkiren eskulanak. Lazkaoko Azki emakume elkarteak, 20. urteurrenean, eskulanen eta hari lanen erakusketa jarri du. Maiatzaren 1era arte, kultur etxeko aretoan egongo da, 12:00-14:00 eta 19:00-21:00 tarteetan. · Kiroldegia itxita. Jaiak direla eta, Barandiaran kiroldegia itxita egongo da bihar, larunbatean eta igandean. Ostiralean 07:00etatik 18:00etara, irekita.
