Legazpiko EAJk balorazioa kaleratu du atzo Batzar Orokorretan GO07 linea hobetzen jarraitzeko onartu zuten proposamenaren inguruan
Herriko konexioak hobetzeko lanean jarraituko dutela aurreratu dute, eta helburua GO07 lineako autobus guztiak Legazpiraino iritsi daitezela lortzea dela nabarmendu dute.
Legazpi eta Donostia lotzen dituen Lurraldebuseko GO07 autobus linea hobetzen jarraitzeko atzo Gipuzkoako Batzar Orokorretan onartu zuten proposamenari buruzko balorazioa kaleratu du Legazpiko EAJk.
Balorazio horretan adierazi duenez, talde honek “denbora asko” darama udalerriko konexioak hobetzeko lanean, eta gogora ekarri du aldarrikapen horren alde agertu zela udalean, GO07 zerbitzuko autobus guztiak Legazpin geratzeko egin zuten eskaria babestean.
Eric Galvez alkateak eta EAJren batzarkideak nabarmendu du lan honek erakundeetan izan behar duen jarraipenaren garrantzia: “Denbora asko daramagu lanean Legazpiren konexioak hobetzeko. Udalean bertan defendatu dugu aldarrikapen hori, eta Batzar Nagusietara eraman dugu. Gaur [urriaren 15a], aurrera egiten jarraitzeko akordio bat lortu dugu, baina gure helburua mantentzen dugu, hau da, GO07 lineako autobus guztiak Legazpiraino iritsi daitezela”. Akordio hau kontrako batere botorik gabe lortu da.
Hobekuntza gehiago lortzeko lana
EAJren arabera, onartu den proposamenak “zerbitzuan egindako hobekuntzak egonkortzea” planteatzen du, “eta udalerriko konexioak indartzeko jarduketa berriak lortzeko aurrera egitea”.
Galvezek azpimarratu du lana ez dela amaitzen ekimen honen onarpenarekin, eta “beharrezkoa” izango dela Foru Aldundiko Mugikortasun sailarekin harremanetan jarraitzea, hurrengo pausoak zehazteko. “Badakigu gai hauek lana, elkarrizketa eta akordioak eskatzen dituztela. Denbora daramagu pausoak ematen, eta horrela jarraituko dugu, Legazpiko bizilagunek garraio publikorako geroz eta aukera hobeak izatea delako garrantzitsuena”.
Legazpiko EAJk aurreratu du udaletik eta Batzar Orokorretatik lanean jarraituko duela GO07 zerbitzua hobetzeko, eta “udalerriko mugikortasun premiak hobekuntza berri bihurtu daitezen” lortzeko.
