San Sebastian jaiak eta mendi lasterketa egingo dituzte asteburuan Garinen
Kanpai bueltekin hasiko dira festak. Igande eguerdian V. Garingo mendi lasterketa jokatuko da, Goierri Kopa Trailerako eta Beasain Challengerako proba puntuagarria da
Garindarrek San Sebastianen omenezko jaiak ospatuko dituzte asteburuan. Eguraldiaren aurreikuspenari dagokionean, aurtengo festak hotzak izatea espero badira, garindarrek sortuko dute berotasuna Garin auzoan.
Larunbatean, 13:00etan hasiko dituzte festak, ohiko kanpai bueltekin eta suziriekin. 14:00etan, herri bazkaria egingo dute Muñogain elkartean. Bazkalondorenerako mus eta punttu txapelketak antolatu dituzte helduenentzat; txikienentzat, berriz, 18:00etan hasita, haur jolasak prestatu dituzte. Jolasak amaitutakoan, sari banaketa ekitaldia egingo dute. Indarrak hartzeko, berriz, jan-edana banatuko dute bertaratzen direnen artean: gaztaina erreak sagardoarekin eta txokolate beroa txurroekin. Arratsalde eta iluntze partea, Josu eta Amets trikitilariek alaituko dute.
Igandea izango da Garinera jende gehiena inguratuko den eguna, batez ere, mendi lasterketari esker. 12:00etan hasiko da Garingo V. Mendi lasterketa herrikoia.
Aurretik, ordea, 10:00etan, Beasaingo Udal txistulariekin goiz eresia eta 10:30ean meza nagusia egingo dute Beasaingo San Martingo abesbatzaren kantuekin lagunduta. Goizean Udal txistularien doinuak izango dira eta eguerdi partean Josu eta Amets trikitilariek jarriko dute festa giroa Garinen.
