Hegialden, jai asteburua

Bihar arratsaldean hasiko dira festak, eta igandeko su artifizialak itzaltzean amaituko dira. Auzoko eta herri osoko kirolariak eta musikariak izango dira gonbidatuen artean.

Tere Madinabeitia

Legazpi

2024/06/06

Aurreko asteburuan rock musikarekin eta bi kirol ekitaldiekin motorrak berotu ondoren, dena prest dago Hegialde Potxola-n bihar arratsaldean hasi eta igande gauera arte jaiak ospatzeko. Eskuko egitaraua banatuta dago San Joan, Urtatza, Laubide eta Ariztiaundiko etxeetan, eta auzo guneari sarrera ematen dion biribilgunean datozen orduetan jarriko dute ohiko ongi-etorri pankarta.

Aurtengo jaiei hasiera emango dien suziria 19:00etan jaurtiko dute, Goiherri jatetxearen paretik, eta hortik aurrera, parrandak ez du atsedenik izango igande gauean azken su artifizialak isildu arte. Hiru egun dira, eta ekitaldiz bete-beteak datoz.

Herritarrak protagonistak
Ekitaldietan, aurten ere herriko artisten eta kirolarien aldeko apustua egin dute Hegialden. Hala, Xabi Zurutuza moto pilotua, Markel Vesga xake jokalaria eta Maldan Behera Inertzia taldeko kideak daude auzokoen gonbidatuen artean, baita DJ Woolen izenaren atzean ezkutatzen den Andoni Romero ere. Trapalata txaranga, Alaitasuna errondaila, herriko buruhandiak eta Sorgintxulo ere izango dira festetan, kanpotik iritsitako beste gonbidatu askoren artean.

Hegialdeko festetako egitaraua

Ekainak 7, ostirala

19:00. Txupinazoa Goiherri parean
19:00. Legazpiko buruhandiak
19:00. Moto 3ko Xabi Zurutuza
19:45. Trapalata txarangaren kalejira, Hegialdeko traje tipikoaz jantzitako auzotarrekin
22:00. Kuadrillen herri afaria kalean, jatekoa norberak eramanda
00:00. Musika emanaldiak: La Mala Pekora eta DJ Woolen

Ekainak 8, larunbata

10:00. Xake txapelketa Markel Vesgarekin
11:00. Puzgarriak
12:30. Alaitasuna errondaila
14:30. Herri bazkaria, jatekoa norberak eramanda
16:30. Lekin pailazoaren emanaldia
18:30. Huescako Santa Cecilia Folklorika elkartearen dantzaldia, Korosti dantza taldeak gonbidatuta
20:00-21:30 eta 00:00. Jamaika Show orkestra