Juan Manuel Garmendia: «Zapore indartsua du, baina gero eta gehiago dira etxean ahatea jaten dutenak»
Gero eta garrantzia handiagoa hartzen ari da ahatea sukaldean, eta Eguberriei begira, Jakitean elkarteak Ahatearen Astea antolatu du. Gipuzkoako 15 jatetxek plater bana osatu dute ahatea oinarri hartuta, tartean Zumarragako Ezkiotarra eta Beasaingo Kattalin jatetxeek. Azken honetako sukaldaria da Juan Manuel Garmendia, eta ekimenaren inguruko hainbat xehetasun eman ditu. Zergatik aukeratu duzue ahatea ekimen hau egiteko? Jakitean elkartean sukaldaritza tradizionala egiten dugun hainbat jatetxe gaude, eta hainbat ekoizlek babesten gaituzte. Babesle horietako batek ahatea eta haren inguruko produktuak saltzen ditu, eta horien berri emateko aurkezpen bat eta afari bat antolatu zituen. Han sortu zen ideia, eta orduan erabaki genuen ahatea oinarri hartuta aste berezi bat antolatzea. Zein da zuek sortu duzuen platera? Ahateki konfitatua griselan, sagar purearekin eta Pedro Ximenez murrizketarekin. Ahatearen izter konfitatutak griselan erreko ditugu, eta sagar purearekin batera konbinatuko dugu. Dekorazio gisa tomatetxoak erabiliko ditugu. Jendeak ba al du ahatea jateko ohiturarik? Hemen ahatea kontsumitzen orain 20 urte inguru hasi ginen, baina ipar Euskal Herrian oso produktu ohikoa da. Sukaldaritza tradizionalean ere pisua hartzen ari da. Eta etxeetan, kontsumitzen al da? Nik uste dut gero eta jende gehiagok erosten duela ahatea etxean jateko. Gaur egun, gainera, ia edozein dendatan dago ahatea erosteko aukera. Egia da jateko zaporez [...]
Juan Manuel Garmendia, Kattalin jatetxean
Gero eta garrantzia handiagoa hartzen ari da ahatea sukaldean, eta Eguberriei begira, Jakitean elkarteak Ahatearen Astea antolatu du. Gipuzkoako 15 jatetxek plater bana osatu dute ahatea oinarri hartuta, tartean Zumarragako Ezkiotarra eta Beasaingo Kattalin jatetxeek. Azken honetako sukaldaria da Juan Manuel Garmendia, eta ekimenaren inguruko hainbat xehetasun eman ditu.
Zergatik aukeratu duzue ahatea ekimen hau egiteko?
Jakitean elkartean sukaldaritza tradizionala egiten dugun hainbat jatetxe gaude, eta hainbat ekoizlek babesten gaituzte. Babesle horietako batek ahatea eta haren inguruko produktuak saltzen ditu, eta horien berri emateko aurkezpen bat eta afari bat antolatu zituen. Han sortu zen ideia, eta orduan erabaki genuen ahatea oinarri hartuta aste berezi bat antolatzea.
Zein da zuek sortu duzuen platera?
Ahateki konfitatua griselan, sagar purearekin eta Pedro Ximenez murrizketarekin. Ahatearen izter konfitatutak griselan erreko ditugu, eta sagar purearekin batera konbinatuko dugu. Dekorazio gisa tomatetxoak erabiliko ditugu.
Jendeak ba al du ahatea jateko ohiturarik?
Hemen ahatea kontsumitzen orain 20 urte inguru hasi ginen, baina ipar Euskal Herrian oso produktu ohikoa da. Sukaldaritza tradizionalean ere pisua hartzen ari da.
Eta etxeetan, kontsumitzen al da?
Nik uste dut gero eta jende gehiagok erosten duela ahatea etxean jateko. Gaur egun, gainera, ia edozein dendatan dago ahatea erosteko aukera. Egia da jateko zaporez oilaskoa baino pixka bat indartsuagoa dela, bere izakera du, baina nik uste gero eta gehiago direla etxean ahatea jaten dutenak. Etxetik kanpo jateko, gibela da estimu gehien duena, baina oilaskoa bezala, atal guztiak jan daitezke, eta jan ezin dena ere aprobetxatu egiten da: lumak eta mokoak laboraregietarako, hezurrak saltsak egiteko…
Prezio aldetik, produktu erakargarria al da?
Nahiko prezio onean dago ahatea. Hamar-hamabi euroan plater bat sortu daiteke, plater on bat, errazio handiekin. Azkenean, txuleta on bat jango balute bezala geratuko lirateke bezeroak ahatearekin prezio horretako plater bat janda.
Gabonei begira antolatu duzue ekimena. Zergatik garai hau?
Gabonei begira eta aste hau berezia delako aukeratu genituen data hauek. Aste honetan jai egun asko daude, jendea kalera irteten da eta etxetik kanpo jateko ere egun aproposak dira. Jendeak errezeta berriak probatu ditzake eta Gabonetan zerbait berezia prestatu nahi dutenentzat aukera polita da.
Errezeta guztiak Jakitean elkartearen webgunean jarriko dituzue, eta horiez gain, sukaldari bakoitzaren beste hiru. Informazio interesgarria da, bai herritarrentzat eta baita sukaldarientzat ere. Plater berriak egiteko aukera eskaintzen da errezeta horien bidez, betiko produktuak erabiliz betikotik irteteko. Jendeak ideiak hartu ditzake, eta ondoren etxean egin.
Aurrerantzean beste ekintzarik egiteko asmorik ba al duzue?
Hilabete honetan elkartuko gara berriro elkarteko kideak, eta datozen hilabeteetan zerbait antolatuko dugu. Azkenean, guk sukalte tradizionala bultzatu nahi dugu, punta-puntan dabiltzan hiru-lau sukaldariez gain euskal sukalte tradizionalean gauza gehiago ere badaudelako. Sukaldea modan dagoela esaten dute, eta batez ere euskal sukaldaritza, baina horren atzena ikusten dena baino gehiago dago.
