Wade Kelly australiarra da Ampo Ordiziaren entrenatzaile berria

Bi urterako kontratua sinatu du, eta laster iritsiko da Ordiziara

2015/07/07

I.Gurrutxaga

Wade Kelly, Ampo Ordiziaren entrenatzaile berria. / www.rugbynetwork.net

Ordizia Rugby Elkarteak 2015-2016 denboraldirako lehen fitxaketaren berri eman du. Wade Kelly australiarra izango da Ampo Ordiziaren entrenatzaile berria. Kellyk bi urterako kontratua sinatu du, eta laster iritsiko da Ordiziara, abuztuan entrenamenduekin hasteko asmoz. Hamahiru urtez jokalari profesionala izan zen Kelly, 2009a arte. Europako taldeetan aritu izan zen batik bat, eta 2010ean itzuli zen sorterrira. Randwick Rugby Club eta The Scots College taldeen entrenatzaile izan da. Ordizia Rugbyk jakinarazi duenez, azken asteetan Ordiziako taldea eta Espainiako Liga aztertzen aritu da Kelly. Euskal Herri erdian dagoen eta errugbia maite duen hiri txiki batera etortzeak “hunkituta” sentiarazten du, bere profilarekin bat datorren talde bat dela esatearekin bat. Datozen bi denboraldietan “garaipen garrantzitsuak lortzea” da haren helburua: “Lan gogorra egingo dugu harro egoteko moduko errugbi erasokorra eskainiz”. Ez du lana soilik buruan: “Munduko leku ederrenetako batean bizitzeak dituen abantailaz gozatzea ere espero dut”. Berritze sakona klubean Entrenatzaile berriaren fitxaketarekin “plantilla profesional ia osoa berritzeko” prozesuari ekin dio Ordizia Rugbyk. “Jokalari berri batzuk badira, eta datozen egunetan gehiagok ere bat egingo dute”, dio oharrak. Laster emango dute horien berri. Ordizia Rugbyren esanetan, harrobiko jokalari gehiagorekin osatuko den “berritze sakona” egin behar dute. “Datorren denboraldia belaunaldi aldaketa batean kokatzen da, trantsizio unean, eta errugbiaz gozatzeko aukera emango du datozen urteetan” Wade Kelly “ilusioz beteta” dator Ordiziara, eta bere prestakuntza klubaren maila tekniko orokorra igotzeko eta lehenengo taldearekin emaitza onak lortzeko balio izatea espero da.