Gabirian 24 kilometroko lasterketa ohiko ibilbidean lehiatuko da, luzea bakarrik. 150 korrikalarik eman dute izena. Goierri Kopa Traileko laugarren proba da
Iñaki Olano altzotarra, iazko garailea, Gabiriako helmugan. // Aimar Maiz Gabiriako Leharrei mendi lasterketaren laugarren ekitaldia larunbat goizean jokatuko da, 09:30ean hasita. Goierri Kopa Trail sailkapenerako laugarren proba baliagarria da, nahiz eta trail distantzia luzean soilik gauzatuko den Leharrein. Ohi bezala eta betiko ibilbidean, 24 kilometro osatu beharko dituzte.
Partaidetza kopurua ziurtatuta dago. Iaz ez bezala, jarritako toki guztiak bete dira, eta 150 korrikalarik eman dute izena. Tartean izango dira iaz gizonezkoetan irabazi zuen Iñaki Olano altzoarra (Goierri Kopako lider da; nesketan, Barbara Martin), eta Martin Diez eta Sergio Serrano podiumekoak.
Nesken sailean 11 lagunek eman dute izena. Ainhoa Sanz emakume garailea ez da Gabirian izango titulua defenditzen. Bai, ordea, Leire Agirrezabala ibartarra, Euskal Selekzioko korrikalari izana, besteak beste.
Lasterketa larunbatean 09:30ean hasiko da. Partaideek dortsalak 08:00-09:00 tartean hartu ahalko dituzte egunean bertan, edo bezperan (18:00-20:00), Osinalde elkartean. Kontsigna zerbitzua ere egongo da, eta bazkariak emango ditu elarteak. Korrikalarientzat dutxak frontoian eta aparte jarritako moduluan jarriko dituzte.
Bost mendi gainditu behar
Gabiriako kaskotik abiatu, eta Murgil muinoari (2. km) eta Trapalata gainari (5. km) heldu beharko diote atletek, berehala. Beherantz izango dute handik 10. kilometrora arte (Errotaberri), bigarren erdi gogorrari ekiteko.
Aizaleku (14. km, 809 metroan) eta Otañu (17.km, 838 m) dira probako sabaiak, Aztiria aldean. Azken kilometroa aldapa pikoan gora egingo dute, Learregi aldapan. Ternua sari berezia jasoko du malda azkarren igotzen duenak: txamarra bat. Hiru orduren barruan iritsi beharko da aldaparen oinera, sarian sartzeko.
Emakumezkoetan Ainhoa Sanzek jarri zuen marka, iaz. // A.Maiz
Janariaren lau anoa jarriko dituzte: Trapalatan, Aizalekun, Aztirian (20.km) eta helmugan. Edariaren beste hiru ere bai, Errotaberrin (9.km), Otañun eta Agerreko Askan.
Bukatzeko, gehienez 4,5 ordu izango dituzte partaideek. Denbora-mozketa Aizalekun egingo dute, 3 orduan. Irabazlea 11:30a aldera helmugaratzea aurreikusten da. Mutiletan, errekora Iñigo Altzola arrasatearrak jarri zuen 2017an (2:00:44), eta nesketan Ainhoa Sanz urretxuarrak iaz (2:25:05).
Zirkulazioa desbideratuta
Ibilbidean bi tokitan aldaketatxo bat sartuko dute, aurten. Pagarretik Atagoitira, Arrasetako gailurreriatik bideratuko dituzte lasterkariak; Errotaberrira jaisteko bidezidorrean baso aldera sartuko dira, 100 metroan, lokazti bat saihesteko.
Herrigunean, zirkulazioari itxi egingo diote errepidea. Frontoi aldeko bidea bi norantzako ipiniko dute. 60 bat boluntariok lagunduko dute.
Mendiari buruzko egitaraua gaurtik, ikuskariarekin
Leharrei lasterketa baliatuz, aurreko bi egunetan ere mendiarekin loturik ekitaldiak izango dira Gabirian. Gaur, Joseba Iztueta mendigoizalearen ‘Denbora izeneko leku bat’ ikus-entzunezkoa emango dute, 19:00etan, kultur etxean. Iazko abuztuan Khan Tengri eta Lenin ‘zazpimilakoak’ bakarrik igo zituen.
Bihar, berriz, II. Kaleko Eskalada Txapelketa jokatuko da, ‘street boulder’ delako modalitatean. Plazan zazpi bide horizontal gainditu beharko dituzte partaideek, lurrik ukitu gabe eta lehen begi bistan. 17:30ean hasiko da. Euria egiten badu, bertan behera utziko dute.
