Beasainmendiko festen barruan antolatzen den lasterketa Irailaren 1ean izango da aurtengoan. Lasterketak 4,7 kilometroko luzera izango du eta 446 metroko desnibela.
Iazko lasterkari sarituak. / Argazkia: Xabier Garmendia Urtero antolatzen duten lasterketa da Usurbe igoera, aurtengoa hamabosgarren edizioa izango da. Irailaren 1ean lehiatuko da, 11:30etan. Beasaingo Artzaieneko plazan emango diote hasiera lasterketari korrikalariek, eta 4,7km egin beharko dituzte. Desnibel positiboa 446 metrokoa da, eta batez besteko penditza %9,5-ekoa. 620 metrotara amaituko da lasterketa.
Iazko lasterketan, gizonezkoetan azkarrena Ahmed Moujane izan zen, Beñat Katarain zegamarraren eta Aimad Bouzianeren aurretik. Emakumezkoetan, berriz, Majida Maayouf iritsi zen Agortara lehenengo; Sara Alonso eta Maialen Loyo izan ziren helmuga zeharkatzen bigarrena eta hirugarrena, hurrenez hurren. Lehenengo beasaindarrak Koldo Agirre eta Amaia Barandiaran izan ziren.
Izen-ematea internetez egiteko aukera izango da www.herrikrossa.com webgunean, edo irteeran goizeko 10:00etatik aurrera. Izen-ematearen prezioa 10€-koa izango da internetez, eta 12€ izango da ordaindu beharrekoa egunean bertan. Sari berdinak izango dira gizonezko zein emakumezkoetan: garaileak 120€ eta txapela eskuratuko ditu, bigarren sailkatuak 70€ eta hirugarrenak 50€. Lehen herritarrentzat sari berezia izango da, eta errekorra hausten duenak 80€ eskuratuko ditu. Parte-hartzaile guztientzat kamixeta eta hamaiketakoa ere izango dira.
