Antioko baseliza, Inaziotar bidean
Zumarragako Antio egun pasa ederra egiteko leku aproposa da. Goierriko ikuspegi zabalarekin gozatzeko aukera izateaz gain, Antioko Interpretazio Zentroa eta baseliza bisitatu daitezke. Inaziotar bideko hiru tenpluetako bat da, Loiolako Basilikaren (Azpeitia) eta Arantzazuko Santutegiarekin (Oñati) batera. Antiotik gora joanez, Beloki eta Izazpi mendietara ere igo daiteke.
![](https://goierri.hitza.eus/site/files/2020/07/3-antio.jpg)
Plan hirukoitza egin daiteke Zumarragako Antion. Batetik, Antioko Interpretazio Zentroa eta Antioko baseliza bisitatu. Interpretazio Zentroan Ignaziotar Lurraldea egitasmoari eta Ignaziotar Bideari buruzko informazioaz gain, Goierri garaiko turismo informazio gunea aurkituko du bisitariak. Bestalde, Interpretazio Zentroan Antioko baselizaren bilakaera historikoa ezagutzera emateaz gain, Zumarragaren historia jasotzen du interpretazio zentroak, XIV. mendean hasi eta gaur egun arte.
Hala ere, baselizen katedraltzat izendatua dagoen harribitxian barneratzeko aukera paregabea ere badago, Antioko baselizan,alegia. Ermita aipatzen duten lehenengo dokumentuak 1366. urtekoak dira. 1576ra arte, Zumarragako lehenengo eliza izan zen. Euskal erromanikoaren adibide argia da, eta gaur egun monumentu gutxi batzuk bakarrik mantentzen dira estilo hartakoak. Harria eta egurra uztartuz, barne edertasun handiko eraikina da. Defentsa izaerako kanpo aldea du, XIV. mendeko erromatarren garaiko atea eta XV. mendeko zabaltze-obretan egindako kalbarioa dira nagusi. Ermitak Ama Birjinaren eskultura gotikoa gordetzen du.
Familia aisialdirako gunea
Hala ere, ondarearekin eta historiarekin batera, naturaz gozatzeko eta atsedena hartzeko toki paregabea da Antio. Goierriko herrien eta mendien ikuspegi ederra dago eta familia-aisialdirako gunea ere badu, zuhaitzekin (pagadia), mahaiekin eta harrizko eserlekuekin, eta parkearekin.
Sasoian daudenek, bertatik paseo atsegina egin dezakete, Beloki mendiraino, eta sasoian daudenek, baita Izazpiraino ere.
Antioko interpretazio zentroa
· Ordutegia. Asteartetik ostiralera: 10:30-14:30, Larunbatean: 12:00-14:30 eta 16:30-18:30. Igandean: 10:30-14:30.
· Erreserbak. 943 72 20 42 / turismobulegoa@urolagaraia.com.
· Bisita gidatuak. Antion bisitak libreak dira baina sare sozialetan iragartzen dituzte eskualdeko bisita gidatu bereziak. Iparragirreren ibilbidea, 11:00etan izaten da.