Oin-Arin taldeak Lazkaon antolatu duen festara sei talde joango dira. Lurraren Urretxuko topaketara, beste zazpi talde. Goizean desfileak eta dantzak egingo dituzte, eta arratsaldean erromeria
Bi herritan dantza egingo dute haur dantzariek, igandean. Lazkaon eta Urretxun Dantzari Txiki Egunak antolatu dituzte Oin-Arin eta Lurra taldeek, hurrenez hurren.
Lazkaon sei talde elkartuko dira, Oin-Arin anfitrioi dela. Oin-Arineko dantzari batzuk, Amets-Bide (Ordizia) eta Aurtzaka (Beasain) taldeek osatutako multzo bat Areria, Hirigoien eta Lazkao Txiki Zelaian ibiliko dira.
Beste multzoa, Oin-Arin, Irrintzi (Urretxu-Zumarraga), Berriztasuna (Portugalete) eta Tobera (Zegama) taldeekin, Areso, Txindoki egoitza eta Jose Lasa Parkera joango da.
Dantzariei 10:30ean egingo diete harrera, Lazkaoko plazan. Hamaiketakoa jan, eta 11:00etan abiatuko dira kalejiran. Atzera plazan 13:00etan bilduko dira, alarde bateratuan guztien artean zazpi dantza egiteko.
Dantzari guztiek bazkaria plazako frontoian izango dute. Arratsaldean, Ttipika taldearekin dantza gidatuak izango dituzte, 17:00ak arte.
Urretxun zazpi talde
Igandean bertan, Urretxun, Lurra taldearen 42. Dantzari Txiki Eguna ospatuko dute. Zazpi taldek parte hartuko dute: Aurtzaka (Beasain), Andra Mari (Galdakao), Korosti (Legazpi), Etorkizuna (Altsasu), Irrintzi (Urretxu-Zumarraga), Danzas de Logroño (Logroño, Espainia) eta Lurra (Urretxu).
Goizean 12:00etatik 13:30era dantza egingo dute. Pagoetatik Gernikako Arbola plazara kalejira egingo dute. Arratsaldean, 17:30ean, dantza saioa egingo dute Gernikako Arbolan. Eguraldi txarra eginez gero, pilotalekuan bilduko dira.
