Mikel Mujika Sicasal taldean Portugalgo Itzulirako
Mikel Mujika legazpiarra Sicasal taldearekin arituko da Portugalgo Itzulian, stagiaire gisa.
Mikel Mujika Larraiotz (Legazpi, 1998) txirrindularia Telco,m ON Clima Osés taldekoa da eta profesionalen mailan lehiatzeko aukera izango du aurtengo Portugalgo Itzulian, Sicasal taldearekin, stagiaire gisa, hau da, proba moduan. Ibilbide oparoa du txirrindulari legazpiarrak eta denboraldi bikaina egiten ari da, izan ere, Euskadiko Itzulian bigarren postua lortu zuen, Espainiako eliteko txapelketan brontzea hartuta etorri zen etxera bueltan, eta abar. Beti ibili ohi da lehen 20 postuetan gutxi gorabehera eta oraingoan, Portugalgo Itzulian aukera bikaina eskaini diote Sicasal taldekoek, bere dohaiak erakutsi eta profesionaltasuneranzko jauzi handi bat emateko bere ibilbidean.
Atzo izan zen lehenengo prologo etapa, 5,4Km-koa, Lisboan hasi eta amaitzen zena, eta emaitza ona lortu du legazpiarrak. Sailkapen orokorren 42.postua lortu du, lehena izan den Rafael Reis txirrindulari portugaldarra baino 28 segundo beranduago zeharkatuz helmugako marra, hala, 6minutu eta 39 segundoko denbora eginez. Hala ere taldekakoan taularen behealdean geratu da Mujikaren taldea, Sicasal. Gaur lehen etapa jokatuko dute.
Portugalgo Itzulia
Nazioartean garrantzi handia duen txapelketa da. Aurten Portugalgo Itzuliaren 83.edizioa izango da eta Lisboako Plaza del Imperio izango dute abiapuntu txirrindulariek. Abuztuaren 4an hasi zen lehiaketa eta abuztuaren 15ean amaituko da, Vila Nova de Gaia helmuga. 9 etapa eta hasierako prologoa izango dira guztira. 130 txirrindularik eta 19 taldek eman dute izena aurtengo itzulian.
