Goierriko Sortuk «gogor» salatu du konpainia energetiko handien jarduna. «Diruzalekeria» leporatu diete, besteak beste. «Haien asmo bakarra da dirua egitea, kosta ahala kosta. Pobretu egin gaituzte, inozo deitu digute eta ez dute lotsarik esateko ez daudela prest zerga gehiago ordaintzeko», adierazi dute.
Sorturen ustez «behar-beharrezkoa» da «errotikako aldaketa bat». «Asko dago jokoan», diote. «Energia-trantsizio justua eta demokratikoa behar dugu. Horregatik, energia sektorean berehalako esku-hartzea aldarrikatzen dugu, herritarrek eta enpresa txiki eta ertainek energiagatik prezio justua ordaintzeko, gutxi batzuek denon kontura negozioa egitea galarazteko, berriztagarrietan oinarritzeko, CO2 isuriak gelditzeko eta oligopolio handiek nuklearra eta gasa bezalako energiak berdez ez margotzeko», gaineratu dute.
Energia-burujabetzaren alde ere egiten dute. Energia menpekotasunak «zaurgarri» egiten duela azpimarratu dute. «Oligopolioen interesetatik at, gure energia beharrak planifikatu eta berriztagarrietan oinarritutako trantsizio energetikoaren alde borrokatzeko dei egiten dugu».
Manifestazioa Bilbon
“Olatu bat altxa behar dugu”, borobildu dute. Horrexegatik, azaroaren 12an Bilbon EH Bilduk –Sortu da koalizio abertzalearen adarretako bat– Abante lelopean egingo duen manifestazioan parte hartzeko deia egin dute.
