Bide Azpiegituretako diputatua A-636 errepideko Beasain eta Ormaiztegi arteko lanak ikuskatzen izan da. "Erabileraren araberako ordainketarik gabe ezin izango zen egin", esan du
Aintzane Oiarbide Bide Azpiegituretako diputatua Beasainen izan da gaur goizean, Beasain eta Ormaiztegi arteko A-636 errepideko lanak aztertzen. 0 eta 5,2 kilometroebn artean Bidegi Foru Elkarteak zorua birgaitu, Salbatoreko eta A-636 eta N-1 errepideak lotzen dituen Antzizargo zubiak egonkortu eta seinalitika berritu dute. Azken ukituak falta dira lanak guztiz amaitzeko. Urtarrilerako erabat bukatuta izango direla iragarri du diputatuak. “Datozen lau urteetan Ormaiztegi eta Zumarraga arteko zatia berrituko dugu”, gaineratu du.
Lanak egiteko beharra zegoela azpimarratu du: “25 urte igaro dira A-636 errepidea 1997ko martxoan inauguratu zenetik, eta ordutik ez du izan Beasain eta Ormaiztegiko arteko tarte honek izan duena bezain birgaitze sakonik, eta aldea nabari da. Gidatzeak nabarmen irabazi du erosotasunean”, adierazi du. 16.000 auto igarotzen dira bertatik, gutxi gorabehera.
Lau milioi euro baino gehiagoko aurrekontua izan dute lanek. “Inbertsio handia” dela neurtu du, eta azpimarratu du erabileraren araberako ordainketarik gabe ezin izango zela halakorik egin. “Hasieratik esan dugun bezala, autobia honen bilketa autobia honen mantenimendurako eta inbertsioetarako baino ez da”. 100 langile aritu dira lanean, uztailetik.
