Hamar karrozak hartu dute parte aurtengo Urretxuko Euskal Jaietako desfilean. HDM irabazle Guggenheim Urdaibai karrozarekin.
Urretxuko Euskal Jaietan hitzordu garrantzitsua izan ohi da desfilea. Hainbat kuadrillak hartzen dute parte, baita herriko zenbait taldek ere, adibidez, Irrintzi dantza taldea, herriko merkatarien taldea, presoen aldeko mugimendua… Aurtengoan 10 taldek hartu dute parte desfilean. Gai desberdinei heldu diete urretxuarrek, baina aurten, nabarmenena osasun mentalaren gaia izan da. Beste batzuek, aldiz, nahiago izan dituzte gazteen etxebizitza eskuratzeko ezintasuna azaleratu, edota Disneyen maitasun historioen kritika egin. Kritika sozial ugari izan dira, baina horien artean epaimahaiari gehien gustatu zaiona Guggenheim Urdaibai izan da, HDM kuadrillarena. Hauek Urdaibain Guggenheim-a jartzearen arazoak argitara atera dituzte. Merkatariek Bitartean Elkartearen 33.urteurrena izan dute karroza egiteko gaitzat, herriari urte hauetan eman dietena eta herriak haiei itzuli dietena azpimarratuz.
Behin karroza guztiak Gernikako Arbola plazara iritsi direnean, txalapartariek hartu dute lekukoa eta ikusleen atentzioa. Hainbat musikari elkartu dira txistulari, dultzainero, txalapartari eta abarren artean oholtzan. Epaimahaiak azkenena hartu du erabakia: HDM kuadrillak irabazi du aurtengo karroza desfilea, Guggenheim Urdaibai karrozarekin. Haien izena entzutean hasi dute ospakizuna eta oholtzan jarraitu. <<Harriduraz>> eta <<pozez>> hartu dute saria.
