Goierriko hamabostaldi ekologikoari hasiera eman zaio. Tailerrak, azoka eta giro «bikaina» Zeraingo Azoka Ekologikoan gaur goizean zehar.
Zeraingo frontoi estalian mugimendu izugarria izan da gaur goizean zehar. Une oro lepo beteta egon da azoka, batez ere, eguerdiko 12ak aldera ibili da jende gehiena. Batzuen eta besteen testigantzak jasota, argi dago guztiek «giro ederra» nabaritu dutela frontoi hartan eta goiz «polita» izan dela. Saltzaileen arabera «oso berezia» izan ohi da Zeraingo Azoka Ekologikoa eta «gogoz» zeuden horretarako. Salmenten gehiengoa «eguerdiko 12:00ak eta 13:00ak bitarte» egin dutela adierazi dute parte batek.
Azokara gerturatu direnak ere «gustora» egon dira azokan. Batzuk janaria erosteko aprobetxatu dute, izan barazki mota desberdinak, fruta, ogia, gazta edota gozoren bat edo beste. Beste batzuk, aldiz, eskuz egindako belarritako, lepoko zein bestelako osagarriak erosi dituzte.
Haurrentzat ere izan da tokia azokan. Gailetak egiteko tailerra izan dute eta hainbat eta hainbat haurrek hartu dute parte bertan. Egindako gailetak jateko aukera izan dute, baita hauek etxera eramatekoa ere. «Pozik» geratu dira emaitzarekin.
Hurrengo egunetan
Goierriko Hamabostaldi ekologikoa hasi besterik ez da egin, eta datorren egunetan ere hainbat ekintza izango dira herri desberdinetan. Irailaren 20an familientzako sukaldaritza tailerra izango da, Lazkaoko Biziola Fabrikan. Parte hartzaileak ekoizleekin elkarlanean arituko dira bertan. Irailaren 23an, berriz, Itsasoko Haristizabal baserrira bisita izango da. Segurako Zopazokan, irailaren 28an, zure platerean hasten da mundua dokumentalaren proiekzioa izango da. Urrian ere beste pare bat ekimen izango dira. hamabostaldiari amaiera emateko, urriaren 4an eta 7an.
