Pilota txapelketari asteazkenean emango diote amaiera
Asteazkenean jokatuko dira Urrezko, Zilarrezko eta Brontzezko finalak, 18:30ean hasita.
Iazko txapeldunak, artxiboko irudian.Emaneurre Pulkraus taldea lagunarteko 11ko futboleko txapelketa herrikoiko txapeldun izendatu berri den honetan, gainontzeko txapelketa herrikoiak ere bere amaierara iritsi dira. Asteazkenean jokatuko dira Emaneurrek antolatutako XIX. Eskuz binakako pilota txapelketa herrikoiko finalak, ohi moduan, haurren jai asteburuari hasiera eman aurretik. 18:30ean hasiko dira.
23 bikoteren lehia
Aurtengo edizioak parte-hartze handia izan du berriro ere. Guztira 23 bikotek hartu dute parte txapelketan, iazko kopurua bikote batez gaindituz. Maiatzaren 2an abiatu zen lehiaketa, eta hilabete luzez luzatutako norgehiagoken ostean iritsi da azken txanpara. Lehen faseko sailkapenaren arabera banatu dira bikoteak hiru mailatan: sailkapeneko lehen zortzi bikoteek Urrezko Liga jokatu dute; bederatzigarrenetik hamaseigarren postura sailkatutakoek Zilarrezkoa; eta gainerakoek Brontzezkoa.
Txapelketako ibilbideak zehaztu ditu, beraz, asteazkeneko hiru final nagusiak. Lehenengo finala Brontzeko ligakoa izango da, 18:30ean hasita. Iraola-Zuloaga eta Garmendia-Barreros ariko dira nor baino nor. Zilarrezko ligako finala 19:15ean hasiko da, Mujika-Otegi eta Otaegi-Aldasoro bikoteen artean. Azkenik, 20:00etan, Urrezko ligakoa jokatuko da: Erauskin-Etxeberria, Alberdi-Otaegiren aurka ariko dira.
Festa giroa nagusi
Ohi moduan, Beti Alai frontoira herritar ugari bertaratzea espero dute antolatzaileek. Izan ere, finalak ez dira kirol lehiara soilik mugatuko, eta giro aparta izango da zalegoaren artean ere. Frontoian, hala, jai-giroa nagusituko dela iragarri dute, eta bertaratzen direnek garagardoa eta giro atsegina eskura izango dituzte.
Hori dela eta, Emaneurre elkarteak herritar guztiei frontoira hurbiltzeko gonbita egin die asteazken arratsaldean, pilotaz, lehiaz eta giro onaz gozatu, eta herriko jaien aurreneko asteburuari hasiera ezin hobea emateko.
