Euskara hobetzeko planak ez du arrakastarik izan ostalaritzan
Ostalaritzan euskara hobetzeko planak izan duen erantzuna negatiboki baloratu dute Urola Garaiko euskara zerbitzuek.
· Otamotz.com – Urola Garaiko euskara zerbitzuek elkarlanean Zumarraga, Urretxu, Legazpi eta Ezkio-Itsasoko ostalariei hainbat eskaintza egin diete euskaraz hitz egin, edo irakurtzeko trebeago senti daitezen. Helburua, eskualdeko taberna eta jatetxeetan euskarak leku gehiago izatea izan delarik. Euskara zerbitzuek prentsa ohar bitartez jakinarazi dutenez, tabernaz-taberna egindako eskaintzak ez du fruitu askorik eman.
Urretxu, Zumarraga, Legazpi eta Ezkio-Itsasoko taberna eta jatetxeetako langileei, euskara trebatzeko hainbat eskaintza egin dizkiete maiatzen zehar eskualdeko euskara zerbitzuek. Euskara ezagutzaren gaineko galdeketa egin eta gero, jasotako emaitzak eskuan lau proposamen luzatu zizkieten.
- Hiru hilabeteetarako HITZAren harpidetza doan.
- Idazmena lantzeko bi orduko ikastaroa.
- Euskararen ezagutza maila baxua dutenentzako hastapeneko ikastaro bat ekainean zehar.
- Irailean hasiko diren mintzalagun taldeetan parte hartzeko eskaintza.
