2013/6

Etxebizitza bat hustu dute Ordizian horma bat erori eta gero

Asteburuan Beasainen hustu zuten etxebizitza bat, luizi bat zela medio. Bart gauean, berriz, Ordizian gertatu da antzeko kasu bat. Euriteen eraginez, Hiruburueta auzoan zegoen horma bat erori zen, 22:30ak aldera. Hormarekin batera, gas hodi bat puskatu zen; haren usaina hartu orduko deitu zuten bizilagunek larrialdi zerbitzuetara. Ingurua aztertu ondoren, Toki Alai etxean bizi diren lau familiei bertatik ateratzeko eskatu zieten. Ertzainak, udaltzainak, suhiltzaileak eta bi anbulantzia bertaratu ziren. Azkenean, bizilagunetako batzuk etxera itzuli ahal izan zuten.

Goierriko Hitza

Kontzertu benefikoa egingo dute igandean Muruaren eta Lopezen alde

Datorren igandean Iñigo Murua eta Markel Lopez haur urretxuarrei laguntzeko kontzertua emango dute Zumarragako Zelai Arizti aretoan. Arratsaldeko zortzietatik aurrera, bi haurren gaixotasunei aurre egiteko tratamendu garestiak ordaintzen laguntzeko aukera izango da, kontzertua zuzenean ikusteko sarrerak erosita edota zero ilarako sarrerak hartuta. Gorka Hermosa soinu jotzailea urretxuarrarekin batera Urretxuko zein Zumarragako hainbat artista igoko dira taulara.

Otamotz.com Urretxu-Zumarraga

Presoen aldeko Bertso Jaialdia

Igande honetan, ekainak 9, presoen aldeko bertso jaialdia egingo da Urretxuko Labeaga aretoan arratsaldeko 18:00etan, Herrira elkarteak antolatuta. Iker Iriarte gai jartzailearen gidaritzapean honako bertsolariek hartuko dute parte: Onintza Enbeita, Beñat Gaztelumendi, Maialen Akizu, Aitzol Barandiaran, Amaia Iturriotz, Julio Soto, Alaia Martin eta Arkaitz Estiballes. Aukera paregabea bertso saio eder batez gozatzeaz gain, presoen senideei laguntza txiki bat emateko. Eta hori nahikoa ez balitz, Urretxu-Zumarragako bertso-eskolako bi perlatxo hauek (Maialen eta Amaia) ur handitan igerian ikusteko.

Otamotz.com Urretxu-Zumarraga

Blokeo egoeran jarraitzen du itunaren negoziazioak Argixao egoitzan

Zumarragako Argixao Lamorous egoitzan langileen eta Gerozerlan enpresaren arteko lan itunaren negoziazioak blokeo egoeran jarraitzen du. Langileen protestak biderkatzen ari dira egunetik egunera. Herenegun, Gerozerlan enpresako ordezkariak egoiliarrekin eta senideekin bildu ziren, baina senide baten arabera «bilera antzua izan zen». Atzo, egoiliarrak eta senideak langileekin elkartu ziren, eta protestan ari diren langileek egoiliarrek nahiz senideek «oso jarrera ona» dutela azaldu dute.

Otamotz.com Urretxu-Zumarraga

Musika kalera aterako dute Kalegorrian zikloaren bitartez

Ekainaren 7an, 15ean eta 22an antolatu dituzte musika saioak Urretxun, Santa Barbara inguruan.

Otamotz.com Urretxu-Zumarraga

Zumarragako zahar egoitzako langileek protestan jarraitzen dute, lan hitzarmen duin baten alde

Zumarragako Lamorous-Argixao zahar egoitzako langileek protesta egin zuten atzo, egoitzaren atarian. Langileak greban daude, lan hitzarmen duina eskatzeko. Elkarretaratzean, lan erreformaren kontrako oihuak egin zituzten, dituzten ordutegiak eta soldata eskasak salatzearekin batera. Langileen arabera, zahar etxea kudeatzen duen Gerozerlan enpresak langileen %25 kaleratu eta gainontzekoei soldata 400 euro jaitsi eta urtean 200 ordu gehiago lan egin arazi nahi die. Zahar egoitzako langile gehienak emakumezkoak dira, eta asteak daramatzate protestan.

Goierriko Hitza

Zumarragan hartuko ditu Gautena autismo elkarteak Goierriko kasuak

Udalak Nafarroa kalean dagoen lokala utzi dio elkarteari; hamar urteko lagapena sinatu dute, luzatzeko aukerarekin

Otamotz.com Urretxu-Zumarraga
Gehiago
HITZAkide HITZAkide

 

ELKARRIZKETAK

ERREPORTAJEAK

KIROLA

Azken bideoak

 

Argitalpen bereziak

Gipuzkoa