
Giro ona izan da nagusi Zumarragako Udaleko osoko bilkuran. Agintaldia hasi zenetik lehenengo aldiz alderdi guztiek onespena eman diete 2014 urterako aurreikusitako ordenantza fiskalei. Orokorrean %1,5 igoko dituzte udalak zumarragarrei ezarritako tasak. Aurreko bi puntutik gorakoa izan da igoera. Mikel Serrano alkatearen hitzetan, «bi urteetan egindako ahaleginari esker udalak jaitsiera egiteko aukera dauka». Igoera beraz gain, ordenantza fiskal berrien ekarpen esanguratsuena hainbat arlotan ezarriko dituzten hobariak dira.

Ionut Zincak gizonezkoetan eta Leire Agirrezabalak emakumezkoetan irabazi dute Zumarraga-Urretxuko VI. Mendi lasterketa. Igandean jokatu zen 23 kilometroko mendi proba, Beloki, Izazpi eta Irimo mendietan barrena. Gizonezkoetan lehia estua izan zen, eta azken metroetaraino elkarrekin joan ziren Zinca eta Pedro Hernandez. Zincak 1:45:31eko denbora egin zuen; Hernandez eta biak Sestao Alpino taldeko kideak dira, eta eskutik helduta sartu ziren helmugara. Emakumezkoen artean, Leire Agirrezabala gazteak sasoi ederrean dagoela erakutsi zuen, eta 2:05:34eko denbora eginda aurrena sartu zen helmugan.

Martxan da Urretxun Urrelur XXVI. Mineralogia eta Paleontologia Astea. Ikastetxeentzako eta interesa duen ororentzako gaurtik hasita bisita gidatuak egiten ari dira asteburura bitartean Urrelur museoan. Horrez gain, hiru erakusketa monografiko antolatu dituzte, Urrelur museoan, udaletxean eta Juan de Lizarazu erakusketa gelan daude ikusgai eta bulkanismoari buruzko hitzaldia eskainiko du bihar Txema Hernandez adituak. Amaitzeko, aste honetako ekintza nagusia asteburuan burutuko da mineral, fosil eta harribitxiekin Ederrena pilotalekuan egingo den XXVI. azoka izango. Haurrentzako parkea ere antolatuko dute azokak irauten duen egunetan.