Gabirian larunbat gauean jokatu zen 46. Osinalde saria, bertsolari gazteentzat. Unai Mendizabal (Zizurkil, 1992) izan da garaile, eta Maider Arregi oñatiarra bigarren. Bertsorik onenaren saria, berriz, Maialen Akizuri eman zioten, 10eko txikiko aurreneko bertsoagatik (“mutil batez ari da maitemintzen, baina zuri esaten ez da atrebitzen” bukatu zuen).
Mendizabal, Akizu eta Arregi, larunbatean Osinalden./Gotzon Aranburu
Elkartea mukuru beteta zela, saio borobila egin zuten aurreko hiru sariketetatik (Aztiri, Argi-Berri eta Osinalde) sailkatutako sei bertsolari: Mendizabal, Arregi eta Akizuz gain, Eneko Araiztegi segurarra, Aratz Igartzabal gabiriar debutaria eta Jon Gurrutxaga azpeitiarra. Maila bertsuan ibili ziren denak, eta entzule askoren iritziz, bertso-saioa “oso ona” izan zen.
Entzuleen botoek ere Mendizabal izendatu zuten onentzat. Bertsolari bati sari bat baino gehiago ez emateko ohitura dagoenez, bigarren sailkatuari eman zioten garaikur hori, Arregiri.
Osinalde elkartea beteta. Gozatu egin zuten entzuleek./Gotzon Aranburu
Mendizabal, zizurkildarra den arren, Asteasuko bertso eskolan trebatua da. Han ibili zen, 12 urtetik 18ra arte. Gaur egun, Villabonako bertso eskolan erakusle aritzen da. Kuadrillakoei eskaini zien azken agurrean Osinaldeko saria, bereziki duela gutxi hil zen Asier lagunari. Txalo zaparrada luzearekin eskertu zuten entzuleek seien lana.
Goierriko albisteak euskaraz, libre eta kalitatez jaso nahi dituzu? Horretarako zure babesa ezinbestekoa zaigu. Egin zaitez harpidedun, izan HITZAkide! Zure ekarpenari esker, euskaratik eginda dagoen tokiko informazio profesionala garatzen eta indartzen lagunduko duzu.
Tokiko informazioa profesionaltasunez eta euskaratik, modu librean kontatzea da gure eginkizuna. Horretarako zure ekarpena beharrezkoa da, eta ongi maitatzeko modurik zintzoena da HITZAkide egitea.
Ezagutu HITZAkide izatearen abantailak eta aukeratu HITZAkide izateko gustuko modalitatea.