Bidegorriak berpiztutako auzoa
Garai batean, Zumarragako Etxeberri auzoa herrigunetik oso urrun zegoela zirudien, ez baitzegoen oinez joateko biderik. Etxeberriko bizilagunak errepidetik edo trenbidetik joaten ziren herrira eta hori oso arriskutsua zen. Urola trena
Garai batean, Zumarragako Etxeberri auzoa herrigunetik oso urrun zegoela zirudien, ez baitzegoen oinez joateko biderik. Etxeberriko bizilagunak errepidetik edo trenbidetik joaten ziren herrira eta hori oso arriskutsua zen. Urola trena kendu zutenean, trenbidean bidegorria egin zuten eta horrek auzoa eta herrigunea asko hurbildu zituen. Auzotarrentzat askoz ere erosoagoa da herrira joatea eta gainontzeko herritarrek Etxeberrira joateko ohitura hartu dute. Asteburu honetan auzoko festak ospatuko dituzte.
Arantxa Goikoetxea janari-dendako nagusia da. Bertan jaio zen. Auzoak 61 urte ditu eta berak 59. Haurra zenean herrira joatea «beldurgarria» zela dio. «Errepidetik joaten ginen eta potzu asko egoten ziren, gainera. Autoek eta kamioiek blai-blai eginda uzten gintuzten. Orrazi fabrikaren parean trenbidera sartzen ginen, bidea mozteko, baina oso arriskutsua zen».
Maite Dominguez bezeroak berak sustoren bat izan zuela oroitzen du. «Bi kamioi pasa ziren eta petrilera igo behar izan nintzen. Haurdun nengoen, baina beharko salto egin!».
Bidegorriari esker, beraien bizi-kalitateak gora egin duela diote. «Egun herrira joatea gozamena da. Behin baino gehiagotan joan beharra badugu, gustura asko joaten gara», dio Goikoetxeak.
Gainera, Etxeberrira lehen baino askoz ere herritar gehiago hurbiltzen dira. «Herri guztiak erabiltzen du bidegorria. Gainera, guraso asko auzora etortzen dira haurrekin, parkean jolastera eta zaldiak ikustera».
Asteburu honetan ohi baino jende gehiago elkartuko da auzoan. Izan ere, festak ospatuko dituzte. Ostiralean hasiko dira, 19:00etan, txupinazoarekin, buruhandiekin eta haurrentzako jolasekin.
19:30ean patata tortilla lehiaketa hasiko da. Jai batzordeak parte hartzaileei osagaiak banatuko dizkie eta nahi duten guztiek tortilla pintxoak jateko aukera edukiko dute. 20:00etan poteo herrikoia hasiko da, 22:30ean tute txapelketa jokatuko da eta 22:30ean bingo herrikoia egingo dute. Tute txapelketan parte hartzeko, bikote bakoitzak 20 euro ordaindu beharko du. Bingoari dagokionez, haurrek zein helduek parte hartu ahal izango dute.
Larunbatean, 12:00etan, toka txapelketa egongo da. 13:00etan poteo herrikoia egingo dute eta 16:30ean mus txapelketa hasiko da. Bikote bakoitzak 20 euro ordaindu behar du. 18:00etan mahai-futbol txapelketa egongo da, 16 urtetik gorakoentzat. Ordu berean, eskulan tailerra hasiko da. 19:30ean gastronomia lehiaketa egingo dute. Aurten marmitakoa prestatuko dute.
Kuadrillen afaria eta beste
Larunbateko ekitaldiekin bukatzeko, 20:00etan poteoa egongo da, 21:00etan gastronomia lehiaketan prestatutakoa aurkeztuko dute, 21:15ean epaimahaiak bere erabakiaren berri emango du, 21:30ean kuadrillek afaria egingo dute, 23:15ean sorpresa bat egongo da eta 23:30ean dantzaldia egingo dute. Dantzaldiaren atsedenean baratxuri zopa eta txokolate beroa zerbitzatuko dute.
Festak igandean bukatuko dira. 11:30etik 14:00etara eta 17:30etik 20:00etara puzgarriak egongo dira auzoko aparkalekuan. 12:30ean bandak joko du, 13:00etan poteoa egingo dute eta 14:30ean bazkari herrikoia egingo dute.
18:00etan Jose Mari Orbegozoren eskolakoek dantza erakustaldia egingo dute, 19:00etan disko festa egongo da DJ Tirapurekin eta 21:00etan Gaixoa ni abestuko dute, jaiei amaiera emateko.