Munduko herrialde desberdinetako bankuko billeteak ikus daitezke D'elikatuz zentroan dagoen erakusketa aretoan. Azaroaren 27ra arte egongo da ikusteko aukera
Mendia gaia ardatz hartuta, munduko bankuko billeteen bilduma dago ikusgai Ordiziako D’Elikatuz zentroko beheko aretoetan. Erakusketa, Emmoak (Euskal Mendizaletasunaren Museoak) egindakoa da eta Mendi bete diru du izenburua, baina Goierriko Mendizale Beteranoen elkarteko kideak izan dira, honakoa Ordiziara ekartzeko ardura izan dutenak. Erakusketa datorren azaroaren 27ra arte egongo da ikusgai.
Munduko hainbat herrialdetako bankuko billeteak dira ikus daitezkeenak. Bakoitzean, dagokion herrialdeko mendi esanguratsu bat agertzen da. Guztiak, zirkulazioan egon diren billetak dira. Emmoak urte asko behar izan ditu guztiak biltzeko.
Donostiako Club Vasco de Camping elkartean ikusi zuten mendizale beteranoek erakusketa hau eta «Goierrira ekartzea interesagarria izan zitekeela pentsatuta, Emmoako kide den Antxon Iturrizarekin harremanetan jarri eta haren bidez» lortu dute erakusketa ekartzea. Gainera, Iturrizak berak bisita gidatua egingo du datorren azaroaren 26an, 18:00etatik aurrera.
Hamargarren urteurrena
Erakusketa interesgarria izateaz gain, badago beste arrazoi bat honakoa Goierrira ekartzeko. Izan ere, aurten, Goierriko Mendizale Beteranoen Elkarteak hamargarren urteurrena du. Urteurrenaren harira, urte osorako ekintza bereziak antolatu dituzte. Maiatzean aurkeztu zuten ekintza egitaraua eta horrekin batera taldeko beteranoenari, Joxe Imaz ordiziarrari, omenalditxoa egin zioten. Gainera, Euskal Herriko Mendizale Beteranoen Topaketa, Goierriko Bira edo taldeko kideentzat Errioxako Ezcaray aldera txangoa antolatu dituzte, besteak beste. Erakusketa ere, arrazoi hori medio antolatu dute.
Urtea borobiltzeko, Ordiziako Mendi astean ere parte hartuko dute, ikus-entzunezko batekin eta azkenik, urte amaiera aldera, bazkaria egingo dute. Iruzkinen atala
