Covid-19aren zabalpena eteteko ekintza-plana eskatu dio Zaldibiako Udalak Osasun Sailari
Zaldibiako Udalak, herriko egoerari buruzko kezka adierazteaz gain, eskaera zuzenak egin dizkio Gotzone Sagardui Osasun Sailburuari eta bere Sailari bidalitako gutunean
Osasun Sailak gaur eguerdian kaleratutako txosten epidemiologikoaren arabera, Zaldibia 400eko mugaren gainetik aurkitzen da oraindik, 7358,26ko eragin tasarekin hain zuzen. «Gutxienez 124 herritar izan dira azken bi asteetan positibo eman dutenak. Herriko 52 etxebizitzatan dugu positibo den norbait, eta beste hainbeste dira berrogeialdi prebentiboan egon diren eta daudenak», azaldu du Zaldibiako Udalak, «Zaldibiako 3 pertsona ospitaleratu behar izan dira gutxienez eta Zainketa Berezien Unitatean egon da haietako bat, adin txikiko haurra». Horrez gain, «hainbat dira sintoma kezkagarriekin dauden herritarrak», baina momentuz etxean daudela adierazi du Udalak.
Egoeraren larritasuna ikusita, transmisioa eteteko bitartekoak eta ekintza plan zehatz bat eskatu dute zaldibitarrek Gotzone Sagardui Osasun Sailburuari eta bere Sailari bidalitako gutunean, ekintzetako bat baheketa deialdi zabala izan daitekeela proposatuz. Osasun Sailetik baheketa masiboak antolatzeko estrategia baztertu bazen ere, martxoan zehar Goierriko hiru herritan (Legorreta, Ataun eta Lazkao) tresna hau berriro erabili zela argudiatu du Udalak: «Ez dakigu baheketa egiteko erabakia hartzeko irizpideak zein diren, baina nabarmen dakigu aipatutako hiru kasuetan baino egoera are larriagoa dela Zaldibiakoa».
Zaldibiako Udalak pandemia osoan zehar eta laugarren olatu honen lehen egunetik adierazi dio bere prestutasuna Osasun Sailari ekintza-plan horren osaeran kolaboratzeko, eta plana aurrera eramateko baliabide-mota ezberdinak ere planteatu ditu: pertsonalak, materialak, azpiegiturak, komunikaziokoak… Hori horrela, honako hauek izan dira Zaldibiako Udalak Gotzone Sagardui Osasun Sailburuari gaur bidalitako gutunean egin dizkion galderak:
- Nola liteke Zaldibiako Udalaren informazio iturri ofizial bakarra euskadi.eus-en astelehenetik ostiralera 12:30etan plazaratzen den txostena izatea?
- Martxoaren 31n burututako bileran, arakatzaile sareak jasotakoarekin egoeraren inguruko analisi bat aurkeztu zitzaigun hainbat udalei. Azterketa hori eguneratu eta konpartitu al dezakezue Zaldibiako Udalarekin?
- Jakinda Zaldibian kutsatzea dibertsifikatu dela eta ez dagoela jatorri bakar bat, zein neurri abiatu behar ditu Osasun Sailak kutsatutako pertsonak identifikatu eta transmisioa eteteko?
- Zein da Osasun Sailaren estrategia eta zein neurriak, Zaldibiako kutsatze katea lehenbailehen eteteko?
