Ordizia Rugby taldeak antolatutako 22. garagardo azoka Beti Alai pilotalekuan egingo dute. Hamazazpi garagardo desberdin dastatzeko aukera izango da, janak eta musikak lagunduta
Badator garagardo azoka, Ordizia Rugbi taldeak, udalaren laguntzarekin antolatuta. Bihar, osteguna, irekiko dute eta igandera arte egongo da zabalik. Egunero, 18:00etan irekiko dituzte ateak, eta 00:00etan itxiko dute. Igandean 12:00etan zabalduko dute.
Aurtengoa, 22. edizioa izango da, eta betiko moduan, Ordiziako Beti Alai pilotalekuan izango da hitzordua. Bost egun horietan, garagardo mota desberdinak dastatzeko aukera izango da, guztira, 17 mota edo barietatekoak izango dira: horiak, zuriak, gorriak, txigortuak eta beltzak, bi IPA eta zeliakoentzako bat. Garagardoak Alemanian, Belgikan, Txekian, Eskozian, Aragoin, Katalunian baita Euskal Herrian ekoitzitakoak ere; bertakoak, Zapiain garagardoa eta Ordiziatik kilometro gutxira, Legorretan ekoizten den Basabe garagardoa ere. Gainera, freskagarriak eta ura ere salduko dira.
Edariari laguntzeko jatekoa ere izango da betiko moduan. Aurtengo eskaintzan berrikuntzaren bat ere sartu dute menuan; hanburgesa beganoak eta kroketak ere izango baitira. Gainera, igandean, paella bazkaltzeko aukera egongo da. Bi paella erraldoi egingo dituzte, bata haragiarekin eta bestea, haragirik gabekoa.
Musika kontzertuak ere egongo dira giroa alaitzeko. Ostiralean Belack taldeak joko du, eta larunbatean, Burrunbazale Fat Dutchmen-en txanda izango da. Larunbat arratsaldean, haurrentzako txokoa ere ipiniko dute, bertan jolasteko aukera izango dutelarik.
Mus txapelketa
Aurtengo garagardo azokaren ediziorako, mus txapelketa ere antolatu dute. Igandean izango da. Parte hartu nahi dutenek, izena eman beharko dute. Horretarako, egunean bertan, kontsumitzeko txartelak erosten diren tokian.
Ordizia Rugby bosgarren 7series txapelketan
Errugbi modalitate olinpikoa protagonista izan da asteburu honetan gizonezko senior mailako Espainiako lehiaketan, Majadahondan (Madril) jokatu den Espainiako 7 Series txapelketarekin. Barça Rugby taldeak multzoko fase perfektua jokatu du, eta ez du puntu bakar bat ere jaso aurka. Guztira 154 puntu lortu ditu. Ordizia Rugbik ere parte hartu zuen txapelketan. Ordiziarrek bosgarren postuan amaitu zuten.
