Gaur hasiko da Azaroan Musika, gala liriko batekin. Hilaren 19ko Santa Zezilia kontzertua da zikloko ekitaldi nagusia. Aurten Urbeltz pilotalekuan izango da
Aurten ere, musikaz beteko da Legazpi azaroan, hilaren 22an ospatzen den Santa Zezilia musikarien egunaren inguruan bildutako ekitaldi sortari esker. Udaleko kultura sailak herriko talderekin eta elkarterekin elkarlanean, Azaroan Musika zikloaren edizio berri bat antolatu du, eta gaur hasi eta hilaren amaierara arte, musika ardatz duten era askotako hitzorduak proposatu ditu.
Azaroan Musika pandemiak eragindako murrizketarik gabe dator, eta urrian gauzatu zen Udazken Musikalaren jarraipena da. Ohi bezala, kontzertuak izango dira zikloaren ardatz nagusia.
Santa Zezilia, pilotalekura
Santa Zezilia kontzertua da zikloko ekitaldi nagusia, herriko musika talde nagusiak elkartu egiten direlako okasio horretarako. Bi urteko etenaren ondoren, aurten ere elkarrekin arituko dira Goiz Deia txistulari banda, Santikutz abesbatza, Alaitasuna errondaila eta Legazpi Musika Banda.
Azaroaren 19an egingo dute kontzertua, baina lekuz aldatuta, parrokia utzi eta Urbeltz pilotalekuan jo eta abestuko dutelako Legazpiko musikariek, 19:00etan hasita.
Hasteko, gala lirikoa gaur
Opera eta zarzuela doinuek irekiko dute aurtengo Azaroan Musika zikloa, gaur 19:00etan Latxartegi Aretoan ospatuko den gala lirikoarekin. Santikutz abesbatzaren ekimenez, goi mailako ahots kontzertua entzuteko aukera izango da, Iruñeko AGAO Gaiarreko Operaren Lagunak elkarteko kideen eskutik.
Cesar Vallejo pianojoleak, Marta Huarte sopranoak, Elena Miral mezzosopranoak, Julen Jimenez tenorrak eta Dario Maya baritonoak opera eta zarzuela aria ezagunenez osaturiko errepertorioa eskainiko dute.
