PSE-EEk Beasaingo aurrekontuentzako ekarpen sorta plazaratu du
Sozialistek energiaren demokratizazioa, familientzako laguntzak, tokiko merkataritzaren sustapena eta espazio publikoen hobekuntza proposatu ditu, besteak beste.
Beasaingo PSE-EE udal taldeak EAJren Udal Gobernuak aste honetan iragarri duen 2026rako aurrekontu proposamenaren aurrean, ekarpena sorta egin du publiko, “herritarren ongizatea, jasangarritasuna eta tokiko garapena ardatz dituen ikuspegiarekin”. Eva Alvarez Beasaingo PSE-EEren bozeramaileak azaldu duenez, helburua da “udalerri jasangarriago eta inklusiboago baterantz aurrera egitea, kalitatezko zerbitzu publikoekin, familiei eta gazteei laguntzeko, merkataritza indartzeko eta klimaren erronkei erantzuteko”.
Sozialisten proposamenek hainbat esparru hartzen dituzte: hiri hobekuntza eta mantentze lanak; gizarte ekimenak; ingurumenarekin lotutako neurriak; eta sustapen ekonomikorako ideiak. PSE-EEren esanetan, guztiek dute helburu komun bat: “Herritar guztiek tokia izango duten Beasain bat eraikitzea”.
Energia-komunitatea eta ingurumena
PSE-EEren udal taldeak tokiko energia-komunitatea martxan jartzeko proposamena egin du. Alvarezen hitzetan, ekimenaren gakoa da “herritarrek energiarako duten sarbidea demokratizatzea, autokontsumo kolektiboan oinarritutako eredu justuago eta inklusiboago baten bidez”. Energia-komunitateak edozein bizilagunek, diru-sarrera maila edozein dela ere, parte hartu eta onurak jasotzeko aukera emango lukeela nabarmendu du.
Ingurumenaren alorrean, beste neurri batzuk ere planteatu dituzte: Sagastiguti parkea babes klimatiko gisa indartzea edota eraikin publikoetan energia aurrezteko sistemak ezartzea.
Familien babesa eta laguntzak
PSE-EEk funtsezkotzat jo du kolektibo ahulenen eta familien babesa handitzea. Horretarako, hainbat laguntza eta sustapen neurri proposatu dituzte: Eskola-materialerako erosketa-bonuak; animalien harrerarako laguntzak; eta auzoko jaietarako partida handitzea
PSE-EEren bozeramaileak nabarmendu du politika horiek “herritarren egunerokoari eragiten dioten beharrak lehen lerroan jartzen dituztela”.
Tokiko merkataritzari bultzada
Beasaingo merkataritza-sareari eusteko asmoz, sozialistek negozio berriak irekitzeko eta lanbide tradizionalak —hala nola, zapataria edo jostuna— mantentzeko neurriak proposatu dituzte. Helburua da, herriko kaleek jarduera ekonomiko bizia izatea eta bertako dendek ikusgarritasuna eta jarraitutasuna izatea.
Hiri-hobekuntzak eta irisgarritasun neurriak
Obra eta mantentze lanen atalean, PSE-EEk espazio publiko seguru eta irisgarrien aldeko hainbat esku-hartze planteatu ditu: Oria pasalekuko atezaintzako parkea estaltzea; Kiroldegiaren irisgarritasuna hobetzea; Txakur-parke berria Ezkiaga auzoan; Foru, Nekolalde eta Zaldizurreta kaleetako espaloiak konpontzea; eta bainu publikoa jartzea Isabel Olano parkean edo haren inguruan
Gazteria eta euskara
Gazteriari zuzendutako programetan, berdintasuna eta prestakuntza digitala ardatz dituzten jarduerak proposatu dituzte: gazteentzako berdintasun tailerrak, IKTen inguruko kanpaina, kanpamentu teknologikoa eta aisialdiko begirale ikastaroetarako laguntzak handitzea.
Amaitzeko, PSE-EEk berretsi du helburua udalerri inklusiboago eta jasangarriago baten alde lanean jarraitzea dela: “Udalerri sozialago eta iraunkorrago baten aldeko konpromisoari eutsiko diogu, agintaldiaren hasieran esan genuen bezala”, adierazi dute.
