Azoka

II. Periazoka igandean Gaintzan

28 ekoizlek hartuko dute parte, aurreko urtean baino zazpi gehiagok. Autobus zerbitzu berezia jarri dute Ordiziatik Gaintzara igotzeko, Zaldibiatik pasatuz.

Manex Usarralde Garmendia

Gaintza

2026/04/15

Periazoka egingo dute bigarren urtez jarraian Gaintzako plazan, igandean, apirilaren 19an, 10:30etik 14:00etara. 28 ekoizle eta artisau egongo dira Periazokan euren produktuak erakusten eta eskaintzen. Aurreko urtean 21 postu izan ziren, aurten baino zazpi gutxiago. Ekintza osagarriak ere izango dira. Eguerdi aldera Asier Gozategi bere Tolosako hainbat trikiti lagunekin eguna girotzen arituko dira.

Herri bazkaria ere izango da herritarrentzat nahiz bisitarientzat, 14:00etan. Aitor Atxegak eta Imanol Kamiok bazkalostea girotuko dute, eta denen artean kantatzeko emanaldia eskainiko dute. Bazkariko txartelak eskuratzeko epea atzo bukatu zen.

Ana Otegi Periazokako koordinatzailearen esanetan, «herriari poz pixka bat emateko», eta inguruko herrietako jendea «Gaintza ezagutzera erakartzeko» helburua du Periazokak: «Urte osoan zehar ez dago inongo ekintzarik, eta aurreko urtean zerbait egin behar genuela erabaki genuen».

Lehengo urteko «emaitzarekin» oso gustura gelditu zirela azaldu du antolatzaileak, jende asko joan zelako. Horrek, aurten errepikatzeko indarra eman die. Otegik dio badakitela Realaren Kopako finalak dela eta datarik onenak ez dela jende asko kanpoan egongo baita. Hala ere, hemen gelditzen den jendeari Gaintzara gerturatzeko gonbita luzatu die.

Garraio zerbitzua
Garraio arazoak saihesteko Ordiziako geltokitik autobus zerbitzu berezia antolatu da. Irteerak 11:00etan, 11:50ean, 12:25ean eta 13:00etan izango dira. Itzulerakoak, berriz, 14:00etan, 14:35ean, 17:15ean eta 17:50ean. Autobusek geldiuneak egingo dituzte bidean: Ordiziako Otegi-Enean eta Zaldibiako Biloren.

Azokako partaideak