San Ignazio jai jendetsuak eta alaiak Legazpin
Ostegunetik larunbatera bitartean ospatu dira, giro paregabearekin.
Joan dira aurtengo San Inazio jaiak Legazpin, eta balantzea positiboa izan da. Eguraldia lagun, oso jendetsuak izan dira, eta giro paregabearekin ospatu dira.
Ostegun arratsaldean hasi ziren suziri jaurtiketarekin eta 21 partaide izan zituen patata tortilla lehiaketarekin, eta larunbat arratsaldean amaitu, giza proba eta aizkora apustua protagonista izan zituen herri kirol jaialdiarekin. Bitartean, ekitaldi ugari izan ziren, eta horien artean, baita berritasun bat ere, gainera, Legazpin bizi diren jatorri desberdinetako herritarrak elkartu zituen munduko arrozen festa. Musika emanaldi ugari, auzoko jubilatuei eskainitako hamaiketakoa, Eufemiano Iturri Korosti mendira igoera, gaupaseroen topaketa eta Palestina, Kuba, Sahara eta “orokorrean ondorio zuzenak jasaten dituztenei” elkartasuna adierazteko elkarretaratzea ere izan dira jai hauetan.
Orain atseden hartzeko tartea da, baina laster iritsiko da datorren urteko jaietan pentsatzen hasteko unea.
Bitartean, Legazpin izango dira jai gehiago, eta lehenak, abuztuaren 28tik 20era bitartean Brinkolan ospatuko diren San Agustinak izango dira.
ARGAZKIAK: Josu Altzelai, San Ignazio auzoko jai batzordea eta Tere Madinabeitia
