Goierriko artea nazioartera
Arteriaren lankidetzaz, eskualdeko 22 artistaren lanak ikusgai jarriko dituzte Mexikon.
Erakusketan parte hartuko duten Goierriko artistetako batzuk.Arteria Errizoma Goierriko 22 sortzaileren lanak Mexiko Hirian (Mexiko) ikusgai jarriko dituzte azaroaren 14tik 27ra, Nihilismo minimoa erakusketa kolektiboan. Goierriko Arteria Errizoma mugimenduak erakusketaren ekoizpen gastuak finantzatuz lagunduko du, «Goierriko artearen nazioarteko ikusgarritasuna» sustatzeko helburuz.
Erakusketa Condesa auzoko Jesus Romero Flores kultur etxean egingo da. Goierriko sortzaileek beren egungo praktika artistikoa formatu txikiko pieza batean sintetizatzeko gonbidapenari erantzun diote, begirada artistiko ezberdinak elkartuz. Sortutako proposamenak diskurtso artistiko funtsezkora eramatea planteatzen du, «subjektibotasunari, zalantzari eta interpretazioari» leku eginez.
Goierriko artistak
Arteriaren bitartez, Ana Cabezas, Angel Frias, Gorka Salmeron, Gurutze Mujika, Iban Aranburu, Iker Antia, Iker Dorronsoro, Iker Valle, Iñaki Zabaleta, Javier Soto, Jesus Lopez Zulueta, Jesus Mari Rodriguez, Jokin Telleria, Jose Luis Elexpe, Pelex; Joxemari Telleria, Juan Ayesta, Kontxi Simon, Noemi saralegi, Pello Goello, Sergio de la Fuente, Uxue Iruretagoiena eta Victor San Juanen lanak jarriko dira ikusgai ozeanoaren beste aldean.
Erakusketak, izenak dioen bezala «minimalismoa eta nihilismoa uztartzen ditu». Astrolab Mexikoko plataformatik, Guillermo Clementeren ekimenez sortu dute erakusketa eta Gorka Larrañaga Azkoitiko margolari eta artista garaikidearekin batera gauzatuko du proiektua.
9.000 euro, Arteria 2026 laguntza ekonomikoaren deialdian
Dar-dar produkzioak gizarte ekimeneko kooperatibak Ormaiztegin aurkeztu berri du Arteria 2026ko laguntza ekonomikoaren deialdia. Deialdiaren bidez, 9.000 euroko laguntza ekonomikoa eskainiko zaio nahigabeko bakardadea eta buru-osasuna lantzen dituen diziplinarteko proiektu artistiko bati.
2024tik aurrera sortutako artelanak nahiz oraindik sortzeko dauden proposamenak aurkeztu ahal izango dira. Proiektuak gutxienez, Goierriko jaiotako edo bertan bizi den sortzaile bat izan beharko dute, baina beste lurralde batzuetako artistekin elkarlana ere onartuko da. Arteriako kide izatea beharrezkoa da parte hartzeko. Doakoa da eta eskaera egitean bertan gauzatu ahal izango da.
Hurrengo herri aurkezpena Seguran izango da, azaroaren 12an, 18:00etan kultur etxean. Informazio gehiago, Arteriaren web gunean.
