Mikel Urretagoienak bere konposizioak berrinterpretatuko ditu Ordizian
Azaroaren 20an D’elikatuz aretoan eskainiko duen kontzertuan, musikari ordiziarrak laukotez aurkeztuko du bere musika, jazzaren, elektronikaren eta inprobisazioaren arteko bideak arakatuz.
Mikel Urretagoiena musikari ordiziarrak kontzertu berezia eskainiko du azaroaren 20an, 20:00etan, Ordiziako D’elikatuz aretoan, Goierriko Jazzaldiaren udazkeneko programazioaren barruan. Bere ibilbidean zehar sortutako konposizio esanguratsuenak berrinterpretatuko ditu, horretarako propio osatutako laukotearekin.
Emanaldian, Urretagoienak beste ikuspegi batetik landuko ditu aurretik sortutako piezak, jazzaren, elektronikaren eta inprobisazioaren arteko mugak esploratuz. Berarekin batera arituko dira Jon Carranza, baxu elektrikoan; Borja Echeverria, teklatuetan; eta Daniel Juarez, saxo tenorrean. Musikari guztien arteko elkarrizketak eta bat-batekotasunak garrantzi berezia izango dute kontzertuan.
Urretagoienak urteak daramatza musika sortzen, eta bateria-jotzaile gisa ez ezik, konpositore eta sortzaile gisa ere garatu du bere ibilbidea. The Machetazo taldean eman zituen konposizioaren arloko lehen urratsak, eta 2024an argitaratu zuen bakarkako lehen lana, DENBORA. Hirukote formatuan grabatutako diskoak izaera intimo eta akustikoa izan zuen.
Oraingo kontzertuan, ibilbide horri begirada berri bat emateaz gain, bere hurrengo proiektuaren lehen zertzeladak ere eskainiko ditu. BANOA izango da Urretagoienaren bigarren bakarkako lana, eta 2027ko udaberrian argitaratzea aurreikusten du. Hala, Ordiziako emanaldian iraganeko konposizioen berrinterpretazioak eta datozen hilabeteetan garatuko duen proposamen berriaren aurrerapenak uztartuko dira.
Goierriko Jazzaldiak, bere aldetik, jazzaren adierazpide anitzak eta inguruko sortzaileen lana ezagutarazteko programazioarekin jarraitzen du. Urretagoienaren kontzertua jaialdiaren barruan egingo den hitzorduetako bat izango da, eta musikari ordiziarrak bere jaioterrian aurkeztuko du bere sormen-ibilbidearen azken emaitza.
