Min hartutako mendizale bat helikopteroz jaso dute Txindokin
Gaur eguerdian aire bidezko erreskatea egin du Ertzaintzak Txindoki mendian. Mendizale batek min hartu du hankan istripua izandakoan, eta mugitu ezinik geratu da Larrunarrirako bidean. Ibilgailuekin pistaz iristeko urrunegi zegoen, eta Eusko Jaurlaritzaren Larrialdietako teknikariek helikopteroaren laguntza eskatu dute. 13:30 aldera jaso du airekoak min hartutako mendizalea, Miramon gainera (Donostia) eraman eta handik anbulantzian Donostiako Ospitalera aldatzeko. Larraiztik gora zihoan mendizalea.
