

Mondragon Unibertsitateko Goierri campusaren Ingeniaritza Graduko bigarren mailan dauden ikasleek patinete motorizatuetarako osagarri bat diseinatu, fabrikatu eta muntatu dute dimentsio jakinetako zama eramateko. Zehazki, talde lanean hiru patinete egin dituzte ikasleek. Eguerdian egin duten euren lanen erakustaldia unibertsitate atarian.

Asteazken arratsaldean hainbat boluntario atez ateko hondakin bilketarako erabiliko diren kuboak banaketarako prestatzen aritu ziren. Mallutz industrialdeko Alumalanen pabiloian bildu dituzte etxeetan hondakinak gaika bereizteko beharko diren kuboak. Datozen egun edo asteetarako deialdi gehiago egingo ditu Ordiziako Udalak antolaketa lanekin jarraitzeko. (Bideoa: Ordiziako Ahotsa)

Metalgintza arloko hirugarren greba eguna egiten ari dira gaur Gipuzkoan, LAB, CCOO eta UGT sindikatuek deituta. Gaurko antolatu dituzten mobilizazioen artean, Adegiko buruaren enpresan elkarretaratzea egin dute hogeita bost bat langilek, LABek deituta. Gainera, lau lagun kateatu egin dira Hine enpresako sarreran. Ertzainak etorri eta kateak ebaki dizkiete. Arazorik egon ez bada ere, tentsio uneak izan dira, ertzainak protestan ari ziren langileei atzera egiteko eskatu dienean. Hine enpresan bildu badira, haren jabea "negoziazio kolektiboan ardura gehien duen pertsonetako bat" delako izan dela azaldu du LABeko Joxe Mari Mujikak.

Argixao egoitzan maiatzaren 13tik greba mugagabean dauden langileen egoeraren harira bi mozio aurkeztu zituzten osoko bilkuran, eta giroa piztu zen mozioen inguruko eztabaidan. Lehenengo mozioa Bilduk aurkeztu zuen EAJren babesarekin, izan ere mozio bat udalbatzarrera eraman ahal izateko bi alderdiren babesa behar da gutxienez. Hala ere, EAJ abstenitu egin zen mozio horren bozketan. Josu Idigoras jeltzaleak bere jarrera azaltzerakoan, «hainbat ñabardura ez ditugu gure egiten» esan zuen.

Goierri kirol elkarteko saskibaloi sailak eta Eiluz gutxitu fisikoen elkarteak antolatuko dute kirol jardunaldia. Asteburuko jardunaldia ekimen ezberdinetan banatuko da. Batetik, ostiralean eta larunbatean jokatuko dira 3x3 txapelketak, «benjamin, kimu, haur eta kadete-junior mailetan». Ion Pol Agirre Goierri kirol elkarteko saskibaloi saileko arduradunak zehaztu duenez, «aurten ez da senior mailarik izango». Bihar, 17:00etatik 21:00etara jokatuko dute benjaminek eta kimuek, larunbat goizean haurrek, 10:00etatik aurrera eta arratsaldean kadete-junior mailakoek 17:00etatik 21:00etara.