
Bigarren urtez jarraian, Baserri Astea antolatu du aurten ere Urretxuko eta Zumarragako Gazte Asanbladak, ZUGAk. Gaztetxearen 11. urteurreneko egitarauren barruan sartu dute berriz, baserriari eskainitako astea, hamaika ekintzekin. Gaur hasi eta igandera arte luzatuko da aurtengoa.

Gorka Hermosa akordeoi jotzaileak bere lehen kontzertua eman zuela 25 urte bete dira aurten, Urretxuko eta Zumarragako musikariekin batera ospatu nahi izan du urtemuga, eta atzo Zelai Ariztiko toki guztiak bete zituen kontzertuak. Izan ere, emanaldiak beste arrazoi esanguratsu bat ere izan zuen, Iñigo Murua eta Markel Lopez haurren tratamenduetan laguntzeko diru biltzea.

Aurreko ostiralean Aizpurutxo bertso sariketaren hirugarren edizioa jokatu zen Aizpurutxoko Itziar jatetxean. Lehenengo aldiz, taldekako txapelketa antolatu da aurten, hain zuzen ere herriarteko txapelketa. Hiru talde izan ziren nor baino nor, Azkoitia, Gabiria eta Zumarraga-Urretxu, eta talde bakoitzean hiru bertsolarik kantatu zuten. Azkoitiko taldea Eneritz Artetxe, Silvia Etxaniz eta Ugaitz Beristainek osatu zuten, Gabiriko taldea Aitzol Iturbe, Mikel Asurabarrena eta Aratz Igartzabal “Potto”-k eta Zumarraga-Urretxuko taldea, azken orduko aldaketa batzuk tarteko, Mikel Iturriotz, Beñat Torres eta Antton Fernandezek. Epaile lanetan herri bakoitzeko ordezkari bana aritu ziren.