
Euskal dantzak oinarri, Irrintzi dantza taldekoek munduko dantzak eramango dituzte etzi Zumarragako Zelai Arizti aretoko taulara. Munduko hainbat bazterretako dantza bertakoekin harilkatzeko ipuin bat asmatu dute. Ipuin hori dantza bidez kontatuko dute. Jaialdia 19:30ean hasiko da. Urtean behin El Salvador auzoko entsegu gelatan ikasturtean zehar lantzen dutena kanpora ateratzen dute Irrintzi dantza taldekoek.

Urretxuko alde zaharra biziberritzeko Zaharrak berri egitasmoa jarri du abian udalak. Azken hamarkadetan herriko gune honek gainbehera nabarmena jasan duela eta, kezka agertu dute bertako tabernariek eta merkatariek. Eskaera honi erantzunez Urretxuko udalak parte hartze prozesu bat jarri du abian, auzoko benetako egoera zein den aztertu eta etorkizun hurbilari begira, aurrera eraman daitezkeen ekimenak zeintzuk izan daitezkeen aztertzeko.

Urretxuko eta Zumarragako Karmakros antzerki tailerrak bat-batekotasunari buruzko ikastaro trinkoa egingo du asteburuan Zumarragako Zelai Arizti kultur etxean. Ikastaroan parte hartzeko izena Urretxuko zein Zumarragako kultur etxeetan eman daiteke. Ikastaroa etzi hasiko da 10:00etan, eta 14:00etaraino iraungo du. Bazkaltzeko eten bat egin ondoren, arratsaldean jarraituko dute, 16:00etan hasi eta 20:00etaraino.


http://youtu.be/F24wZyNeq0o Urteko hiru azoka garrantzitsuenetako bat, Artzain Egunekoa egiten ari dira gaur Ordizian. Giro onak lagunduta, jendetza bildu da aurten ere Ordiziako kaleetan. Arreta gune nagusiak bi izan dira: batetik, ardien pasaera. Izan ere, larreen irekiera eta artaldeen igoera irudikatzeko, 2.000 arditik gora pasa dira Ordiziako kaleetatik, lau artaldetan banatuta. Bestetik, gazta berriaren ebakitzea. Denboraldi berriaren hasiera irudikatzeko, Ruben Trincado, Mirador de Ulia jatetxeko sukaldariak ebaki du lehen gazta.

Urtero ohitura bihurtu denez, Urretxuko eta Zumarragako udalek antolatuta hainbat ekintza izango dira haurrei eta gazteei zuzenduta Pazko Asteko egun hauetan zehar. Atzo arratsaldean hasi zituzten, esaterako, Urretxun Lizeo azpian haurrentzako urtero antolatzen dituzten ekintza saioak. Gazte Bideanen ere, Aste Santuko atsedenaldiaren ondotik, larunbatera bitartean hainbat ekintza antolatuta dituzte gazteentzat, larunbatera bitartean.