Udarekin batera dator festa
Uda garaiko aurreneko festak izaten dira suaren bueltan hasten diren 'sanjoanak'. Olaberriko eta Segurako jai nagusiez gain, hainbat auzotan ere ospatzen dira
Udako solstizioarekin batera dator San Joan bezpera, eta herri eta auzo askotan, suarekin batera hasiko dituzte festak. Seguran eta Olaberrian, esaterako, herriko jai nagusiak dituzte asteburuan. Beste zenbait herritan berriz, auzoetako festak izango dituzte; horien artean daude Ataungo Arrondo, Ordiziako Otegi Enea eta Legazpiko Telleriarte auzoak.
Olaberrian, tantaia jasotzen.
Pilota eskolako Sara Izagirrek irakurriko du Segurako pregoia
Bihar, 20:00etan, Zopa pertzaren jaitsierarekin hasiko dira aurtengo Segurako San Joan festak. Pertzaren jaitsierarekin batera, pregoia irakurriz festei ongi etorria egingo diete. Aurten, festa batzordeak proposatuta, Segurako Pilota Eskolak du aurtengo pregoia irakurtzeko ohorea eta protagonismoa. Inge Olano pilota eskolako arduraduna pozik dago, izango duten ardurarekin eta protagonismoarekin. «Oso gustura gaude, batez ere pilotari indar pixka bat emateko herri mailan. Herriko programan gatoz eta festen hasierako ekitaldian herri guztia egoten da. Pilota eskola hor ikusita, indar pixka bat emateko aukera ona da». Gaur egun 50 bat neska-mutil dabiltza Segurako Pilota Eskolan. «Hasi ume asko egiten dira baina jarraitu gutxik egiten dute». Neska bakarra dabil pilotan, Sara Izagirre, eta berak ikurriko du pregoia, «herriko beste neskek ere ikus dezaten neskak ere ari direla pilotan». Adin nagusiagoko Segurako hainbat pilotari, berriz, Lazkaoko eta Zegamako klubetan dabiltzala ere jakinarazi du. Garai batean indar handia Dena den, garai batean, indar eta garrantzia handia izan zuen pilotak Seguran. Pilotari handiak izan dira, Martin Alustiza eta Xabier Imaz, adibidez. Herri arteko pilota txapelketan ere lau txapelketa irabazitakoak dira segurarrak. Baina «azken urteetan beste kirol aukera batzuk hartu dute indarra. Gaur egun abaniko zabalagoa dute haurrek kirol bat aukeratzeko orduan eta azkeneko urteetan dezenteko beherakada nabaritu dugu pilotan. Dena den, ez da Segurako kontua bakarrik, orokorra da», aitortu du segurarrak. Pilotalekuak jendez beteta egoten ziren garaiak ondo gogoan ditu Olanok, «ez zen leku asko izaten pilotalekuan eta aurrera iritsitako pilotari asko izan da». Orain Goierrin pilotari txapeldun bat izan da, Iker Irribarria aramarra, aukera ona izan liteke pilota indartzeko: «Bultzada handia ematen du pilotari on batek egonez gero». 1986tik lanean Segurako Kirol Elkartea 1986. urtean sortu zen ofizialki herrian kirola, eta batik bat pilota bultzatzeko helburuarekin. Gaur egun Mendi Elkarteak eta Pilota Elkarteak osatzen du Segurako Kirol Elkartea. Segurak pilotarako duen zaletasunari eustea eta herritarrak pilotaz gozaraztea da bere helburu nagusia. Aurtengo festei dagokionean, antolatu dituzten pilota partidetara joateko gonbita luzatu nahi diete herritarrei.
