Ehunmilak lasterketako hiru probetan bukatu dira dortsalak
Bart gauean bukatu dira EHM ultratrail probarako dortsalak; G2H eta MMM probetakoak lehendik zeuden agortuta. Gaur bukatuko da mediku txostenak aurkezteko epea; aurkeztu ezean, itxaron zerrendetatik hasiko dira.
Korrikalariak dortsalak hartzen, iazko probaren atarian. // Argazkia: Loinaz Agirre 
Lehen egunetan bukatu ziren G2H eta MariMurumendi lasterketetako dortsalak, eta bart gauean, izen-emateak bukatzeko 24 orduren faltan, Ehunmilak ultratrailekoak ere bukatu egin ziren. Beraz, 515na lagun ariko dira EHM eta G2H probetan eta 265 MMM proban.
Bestalde, gaur bukatuko da mediku txostenak aurkezteko epea, eta antolakuntzak ohartarazi duenez, txostena aurkezten ez duena zerrendatik kanporatua izango da eta itxaron zerrendan daudenei egingo diete tokia. Oraindik 64 lagun falta dira mediku txosten horiek aurkezteko.
