Xabier Arratibel errezil sagarretan eta Arantxa Agirre sagar goxoetan txapeldun
Bestalde, Gipuzkoako Erlezain Elkarteak antolatutako Goierri Beheko Ezti Lehiaketa Igor Altuna lazkaotarrak irabazi du.
Gaur goizean ospatu da Gabiriako Errezil sagarraren XIX. eguna. Euripean izan den arren, bertakoak arkupeez baliatu dira errezil sagarra eta haren fruitutik ateratako hoberena plazaratzeko. Urteroko legez, Errezil sagar lehiaketa, sagar goxo edo menbrillo lehiaketa eta Goierri beheko ezti lehiaketa ospatu dira bertan. Lehiaketez gain, baserritar ekoizleen produktuak dastatzeko eta erosteko aukera ere egon da.
Errezil sagar lehiaketa
23 urte daramatzate errezil sagarra bultzatzen Gabirian. Aurtengo txapelketan, 13 errezil sagarretatik hoberena zein den aukeratu dute. Horren ardura Juan Cruz Baztarrikak, Javier Mujikak eta Ramon Aseginolazak hartu dute. Puntuazioaren arabera gaurko irabazlea Xabier Arratibel izan da. Bigarren errezil sagar onena Juan Muruak ekoitzitakoa izan da. Hirugarren, ordea, Xabier Arratibelen anaia, hain zuzen ere, Iñaki Arratibel geratu da. Saria jasotzen bakarra Jesus Sagaspe izan da, lehiaketa honetan lehenengo aldiz parte hartu duelarik. Hurrengo urtera begira diru laguntzak jaso eta sistema aldatuko dutela esan du Gabino Muruak.
Menbrillo lehiaketa
20 izan dira Kattalin jatetxeko Juanma Garmendiak eta Ondojan elkarteko Josema Azpeitiak dastatutako menbrilluak. Hauek kolore zein testura ezberdinetakoak ziren begi-bistan, eta haien artean ez omen zuten zapore antzekorik Josema Azpeitiak esan moduan. Hori dela eta, nahiko garbi izan dute Arantxa Agirrek ekoizten duen sagar goxoa zela denetatik goxoena.
Goierri Beheko Ezti Lehiaketa
Gipuzkoako Erlezain Elkarteak antolatutako Goierri Beheko Ezti Lehiaketa Igor Altuna lazkaotarrak irabazi du harena izan baita 12 eztietatik atseginena. Jon Etxeberriak, Ariane Unanuek eta Aratz Igarzabalek osatu dute erabaki hau hartu duen epaimahaia. Bigarren sailkatua, Ageda Zeberio izan da eta sailkapena Jesus Perezek itxi du.