Etxean ekoitzitako edozein espresio eta euskarri sorkuntza aurkez liteke apirilaren 10erako. Bost adin maila bereizi dituzte, herritar guztientzat.
Sorkuntza, irudimena, talentua, ilusioa... eta ondo pasatzeko nahia uztartuko ditu Zeasma lehiaketak. Zer asma dagoena baino okerragorik ez omen da, baina ezertarako balio ez duenik ere ez omen dago. Hala, itxialdiko egunotan burua astindu eta sormena dantzan jartzeko deia egin du Gabiriako Udalak, I. Zeasma Kultura Lehiaketa abiarazita. Atzo zabaldu zuten kartel digitala sare sozialetan, eta apirilaren 10erako aurkeztu behar dira lanak.
Bost sail bereizi dituzte, adinaren arabera (2020-12-31n norberak izango dituen urteen arabera): 0-5 urte, 6-11 urte, 12-16 urte, 16-60 urte eta 60 urtetik gorakoak. Sormenezko lanak egin behar dira: marrazkiak, bideoak, olerkiak, bertsoak, txisteak…
Lehiaketaren arauak honakoak dira:
- banaka, binaka edo taldean eman daiteke izena
- pertsona bakoitzak lan bakarra bidali ahalko du
- lanak bidaltzeko azkeneko eguna apirilaren 10a da. Udalaren posta elektronikora (udalbatzordeak@gmail.com) edo WhatsAppera (635 20 39 58) bidali behar dira.
- bozketa herrikoi bidez erabakiko dira sail bakoitzeko sorkuntza lan onenak
- apirilaren 13tik 19ra udal webgunean (gabiria.eus) jarriko dituzte lanak ikusgai, gustukoenarentzat botoa emateko aukerarekin
- saria: adin-talde bakoitzeko 30 euroko bonua, Lazkaoko Gerriko liburu-dendan gastatzeko.
