Matadero Extrem abentura txapelketa antolatu du Legazpiko Gaztetxeak
Txirrindulari arropa ere kaleratu du, eta artisau garagardoen dastaketa gidatua ere egingo du.
Legazpiko Gaztetxeak indarrez heldu die uda aurreko asteei, eta hainbat jarduera antolatu ditu datozen egunetarako. Matadero Extrem abentura txapelketa da horietako bat. Sei partaidez osatutako taldeek, hainbat joko gainditu beharko dituzte ikurrina lortzeko. Izen-ematea internet bidez edo gaztetxean bertan egin behar da, eta azken eguna hilaren 13a da.
Bestetik, artisau garagardoen dastaketa gidatua ere antolatu du, ekainaren 18rako, ostirala. Nafarroako Sesma Brewing enpresaren laguntzaz egingo da dastaketa gidatua, eta ticketak dagoeneko salgai daude Gaztetxean bertan 15 euroan.
Azkenik, txirrindulari arropa ere atera du, eta ekainaren 17ra arte dago arropa hori erosteko aukera, Gaztetxean hori ere. Legazpiko Gaztetxearen coulloteak 78 euro balio du, maillotak 50 euro eta biak batera erosiz gero, 128 euro.
