Errege Egunaren biharamunean hasitako merkealdi garaian murgilduta daude Goierriko dendak. Euskadi Bonu Denda gehiago salgai jarri ditu Eusko Jaurlaritzak; martxoaren 31ra bitartean erabil daitezke.
Garai batean bezalakoa ez da, ez dauka zerikusirik». Horixe da dendariek diotena. Duela urte batzuk arte, Errege Egunaren ondorengo egunaren zain egoten ziren herritar asko eta asko, aurretik begiz jotako arropa, oinetakoak edo dena delakoa erosteko. Gaur egun, ordea, beherapenen aldia ez dago hain arautua eta itxia, eta urteko beste hainbat garaitan ere beherapenak eskura ditzake kontsumitzaileak.
Beraz, Ordiziako Imana jantzi dendako Ima Arregiren esanetan, «oso-oso triste hasi da merkealdia, nire kasuan behintzat». Gainera, azaroan eta abenduan herrietan izandako bonuei esker, herritarrek aurreratu egin dituzte erosketak, «bonu batekin eta bestearekin ia %40ko beherapena» lortzeko aukera izan baitzen. «Azaroan eta abenduan gainera taila eta arropa aukera handiagoa egoten da eta eguraldi txarrak ere lagundu zuen».
Erakundeen bonu sistema horiei esker, neguko denboraldia «ez da hain gaizki joan», nahiz eta pandemiaren aurreko garaiarekin zerikusirik ez izan Arregiren esanetan.
Bonuen beste alde on bat ere nabarmendu du: «Bonuei esker, agian erosketak herrian ohitura galdu zutenak itzuli egin dira. Herrian bertan eskaintza ona dugula ikusi dute eta herrian mugimendua sortu da». Egunotan jaurlaritzak Euskadi Bonu Denden kanpaina abiatu du berriz, hurbileko merkataritzan kontsumoa sustatu eta tokiko kontsumoa bultzatzeko.
Txanponaren beste aldean dago, konfinamenduan egon den herritar kopuru handia. «Interneta bestela ere gero eta indar gehiago hartzen ari da eta konfinamenduan egon diren horiek ahal duten moduan egin behar izan dituzte erosketak eta Internetera asko jo behar izan dute».
Merkealdirako aholkuak
Kontsumobidek hainbat gomendio ematen ditu merkealdi garairako. Oinarrizkoa hauxe da: «Beti azaldu behar da zein den jatorrizko prezioa eta zein merkealdikoa».
Bestalde, erosketak planifikatzearen garrantzia nabarmendu du, «eta ez utzi publizitateari irabazten. Erosi beharrezkoa duzuna soilik eta ez gainditu zure aurrekontua». Azkenik, bermerik onena, herriko edo auzoko dendetan erostea dela gogorazi du: «Ezagutzen zaituzte eta lagundu egingo dizute; horrela tokiko merkataritza izango da garaile».
